Top 9 most wanted person sikop sa kapolisan sa Lapu-Lapu

CEBU, Philippines — Nasikop sa Criminal Investigation and Detection Group(CIDG) Lapu-Lapu City Field Unit ang usa ka top 9 most wanted person regional level pinasikad sa warrant of arrest sa kasong homicide sa Sitio Mahayahay, Barangay Bangkal, Dakbayan sa Lapu-Lapu niadtong Huwebes sa udto.

Ang suspetsado mao si Jephosin Zusubrado Cantunao, 30-anyos, construction worker, taga Barangay Matab-ang, Siyudad sa Toledo apan kasamtangan nga nagpuyo sa Barangay Bangkal Dakbayan sa Lapu-Lapu.

Si Police Captain Joel Deiparine sa CIDG Lapu-Lapu City Field Unit maoy nangulo sa pagsikop sa suspetsado.

Si Regional Trial Court (RTC) Judge Chaunsey Torejas Boholst sa Branch 18 sa Dakbayan sa Sugbo ang niisyu sa warrant of arrest batok sa suspetsado.

Ang korte nirekomendar og P120,000 nga piyansa alang sa temporaryong kagawasan sa suspetsado.

Si Cantunao maoy gitudlo nga responsable sa pag tigbas patay sa usa ka ex-convict nga si Rico Oquiño, 25 diha sa Sityo Upper Puti, Barangay Buhisan, Dakbayan sa Sugbo niadtong Agusto 27, 2024.

Gikataho nga selos ang hinungdan sa iyang pagtigbas sa biktima tungod kay ang iyang kanhi kaipon nga si Jarisa Biasong, 27, mao na ang gikarelasyon niini.  BDB BANAT NEWS