Mga barong-barong gipangguba paghawan sa sapa

CEBU, Philippines — Nahawanan na ang sapa sa Sitio Naba, Barangay Mambaling, Dakbayan sa Sugbo human nga gipangguba ang mga natukod nga barong-barong nga giingong usa sa mga problema sa baha sa maong barangay.

Ang kagamhanan sa siyudad nihatag og tag P20,000 nga pinansiyal nga hinabang ug materiyales alang sa pagtukod og balay sa mga pamilyang naapektohan.

Nasayran nga mga Bajao ang nagpuyo sa maong mga barong-barong ug sila usab ang nangunay sa pagguba sa ilang pinuy-anan.

Sa pagpakighinabi sa Banat News ngadto kang Mambaling Barangay Captain Seller Salvador nagkanayon kini nga gipahiluna una ang mga lumulupyo diha sa kasikbit nga sitio. “Sila mismo ang niguba sa ilang mga barong-barong aron nga madala nila ang mga materiyales sa ilang sunod nga kapuy-an”, matud ni Salvador.

Gibutyag ni Salvador nga sugdan na sa barangay ang pagpalawom sa kasapaan ug kuhaon usab ang mga basura nga nakabara sa sapa aron makagayday na ang tubig paingon sa dagat.

Dugang ni Salvador nga gawas sa lakang sa kagamhanan sa siyudad nga Gubat sa Baha aduna usab sila’y lakang sa barangay nga gitawag nga Gubat sa Kanal aron nga mas limpiyo pa ang mga pipila ka mga dapit sa barangay.

Sa laing bahin, gipahibalo sa kagamhanan sa Siyudad sa Lapu-Lapu ang pagbalhin sa mga molupyo sa Sitio Lawis, Barangay Pusok ngadto  sa relocation site niini sa Barangay Canjulao sa maong siyudad.

Ang maong mga molupyo gikatakda na unta nga i-demolish ang ilang mga panimalay nga gipuy-an sa tag-iya sa luna apan gihangyo ni Mayor Junard "Ahong" Chan ang tag-iya sa luna nga hatagan kini og lugway nga 15 ka adlaw

Nasayran nga nakalitan ang maong mga molupyo niadtong Martres nga nagpahibalo  ang tag-iya ngadto kanila nga i-demolish na sila niadtong Miyerkules, Enero 22, 2025. Ang nahisgutang mga residente nidangop kini kang Chan og nangayo og tabang.

Si Konsehal Celestino Aying, chairman sa Committee on Urban Poor sa konseho sa siyudad nagkanayon nga ang tanang naapektohang pamilya ibalhin sa kagamhanan sa siyudad ngadto sa relocation site  sa Canjulao ug hatagan sila  og lugway nga mga adlaw alang sa pagpatukod sa ilang mga panimalay. Nunot niini  ang kagamhanan sa siyudad pinaagi sa buhatan sa City Social Welfare Office ang mohatag usab sa mga apektadong pamilya og P30,000 nga pinansiyal nga ayuda ug P10,000 ang pasiunang ghatag ngadto kanila alang sa pagtukod sa ilang mga panimalay sa relocation site nga gihatag  sa kagamhanan sa siyudad. (BANAT NEWS)