Usa ka tuig nga bata nalumos sa balde

CEBU, Philippines — Patay ang usa ka tuig nga batang lalake human kini nalumos sa balde nga dunay tubig sa Purok 6, Barangay San Isidro, Lungsod sa Sagbayan, Probinsya sa Bohol, Martes sa buntag, Enero 21, 2025.

Ang batang lalake gidala pa sa tambalanan apan nakabsan gihapon kini sa kinabuhi paglabay sa pila ka oras.

Sigon ni Police Captain Eric Binangbang, Hepe sa Sagbayan Police Station nga nahinabi sa DYSS Super Radyo Cebu nga ang biktima nagduwa gawas sa ilang panimalay uban ang mga igsuon niini dihang nahitabo ang insidente.

Samtang ang mga ginikanan sa bata namahaw sa balay sa ilang apohan nga dili ra layo sa ilang pinuy-anan ug gipahibawo na lang sa ilang silingan nga ang bata nagduwa sa balde nga dunay tubig sa likod nga bahin sa ilang balay.

Gisugo sa mga ginikanan ang 5-anyos nila nga anak nga susihon ang bata ug didto nadiskobrehan nga ang biktima nagtuwad na sulod sa balde nga dunay tubig.

"Dili man kaayo daghan ang tubig, gani lang kay ang iyang nawong nag-atubang sa ilawom nga bahin sa balde", matod ni Police Captain Binangbang.

Midugang si Captain Binangbang nga ang biktima duna pay pulso dihang nadiskobrehan hinungdan nga gidala dayon kini sa ospital apan paglabay sa pila ka oras nabugtoan gyud kini sa ginhawa.

Nasayran ang biktima ika-upat sa lima ka mga anak sa magtiayon.

Ang amahan niini usa ka pumpboy samtang ang inahan kay housewife. (BANAT NEWS)