Public Wi-Fi sa siyudad sa Sugbo mas palapdan

CEBU, Philippines — Public Wi-Fi sa Plaza Sugbo buot nga mas palapdan pa ni Cebu City Mayor Raymond Alvin Garcia aron magamit dili lang sa mga Sugbuanon apan lakip na sab sa mga turista.

Niadtong Disyembre 2, 2024, gipahigayon ang groundbreaking ceremony ug human sa kapin sa usa ka buwan, niadtong Enero 20, 2025 gipahigayon ang turnover ceremony sa public Wi-Fi diin gitambungan kini nila ni Konsehal Jaypee Labella ug Konsehal Francis Esparis ug sa mga representante sa Trends and Technologies Inc. ug mga department heads sa Cebu City Hall.

Tumong sa pag-instalar sa maong pampubliko nga Wi-Fi aron nga magamit sa mga kabatan-unan ug sa mga bisita sa Sugbo aron nga makapatakap og maayong impormasyon pinaagi sa ilang mga social media accounts.

Adunay libre nga internet nga mapahimuslan sulod sa duha ka oras sa matag gadget.

Nimando na usab si Garcia ngadto kang Konsehal Labella nga siguraduhon nga magamit kini sa kadaghanan ug dili kini hinay sa matag user.

Gipaniguro ni Garcia nga dili lang masinati sa Plaza Sugbo ang libre nga internet apan sa pipila sab ka mga hotspots sa dakbayan. Alang kang Garcia, mao na kini ang sinugdanan sa pagpalapad sa digital accessibility sa siyudad.

Napanglantawan usab ni Garcia nga inanay ra nga matagamtaman sa tibuok 80 ka mga barangay sa siyudad ang libre nga Wi-Fi aron nga mas mapalambo pa ang mga serbisyo publiko ug mas konektado pa ang katawhan ngadto sa gobyerno. (BANAT NEWS)