34 ka tawo sikop atol sa gipahigayong SACLEO sa Lapu-Lapu
CEBU, Philippines — Nadakpan sa usa ka semanang Simultaneous Anti-Criminality Enforcement Operation (SACLEO) sa kapolisan sa Lapu-Lapu City Police Office (LCPO) ang 34 ka tawo nga nakahimo og nagkalainlaing kalapasan sa balaod.
Si Police Lieutenant Colonel Christian Torres, tigpamaba sa LCP0 miingon nga naglakip sa mga nadakpan atol sa buy-bust operation mao ang walo ka mga pusher sa managlahing dapit sa dakbayan.
Matud pa ni Torres nga nasakmit nga ebidensiya gikan sa maong mga dinakpan ang 23.9 gramo nga shabu nga nagkantidad og P157, 760.00.
Nadakpan usab sa kapolisan sa LCPO ang 16 ka mga tawo nga naaktohan nga nagpasiugda og ilegal nga sugal nga naglakip sa hantak, tong-it ug ilegal nga suwertres
Nasakmit nga ebidensiya sa kapolisan mao ang P3,076.00 nga kuwarta nga pusta uban usab sa mga gambling paraphernalia.
Si Torres miingon sa mga Most Wanted Person wala silay nadakpan apan napulo ka mga Other Wanted Person ang ilang nasikop.
Ang mga nadakpan pulos nag-atubang og gagmay nga kaso apan nalutsan kini og Warrant of Arrest sa korte nga maoy ilang gibasehan sa pagdakop. (BANAT NEWS)
- Latest
