Laing umento sa sweldo sa mga kawani sa gobiyerno ipatuman
CEBU, Philippines — Gipirmahan na sa sekretarya sa Department of Budget and Management (DBM) nga si Amenah "Mina" F. Pangandaman ang lagda o regulasyon alang sa ikaduhang tranche sa umento sa suweldo sa mga empleyado sa gobyerno.
Ang lagda mao ang National Budget Circular No. 597 nga nagtuman sa updated Salary Schedule para sa mga Civilian Personnel, base sa Executive Order (EO) No. 64, s. 2024 nga gipirmahan ni Presidente Ferdinand "Bongbong" R. Marcos, Jr. niadtong Agosto 2024.
"Sa pagpapatuloy po ng pangako ng ating Pangulo, ipatutupad po natin ngayong January 2025 ang pangalawang bahagi ng salary increase para sa ating mga kawani ng gobyerno,” matud ni Pangandaman.
Sa maong Cicular, ang updated Salary Schedule ipatuman sa upat ka hugna. Una nga hugna nagsugod niadtong Enero 1, 2024; ikaduha sa Enero 1, 2025; ikatulo sa Enero 1, 2026; ug ang ikaupat ug kataposang tranche mahitabo sa Enero 1, 2027.
Ang umento sa suweldo ipatuman sa tanan nga personnel sa gobyerno nga nagtrabaho sa Ehekutibo, Lehislatibo, Hudikatura, Constitutional Commissions, State Universities and Colleges, ug Government-Owned and Controlled Corporations (GOCCs) nga wala nalakip sa Republic Act (RA) No. 10149 ug EO No. 150, s. 2021.
Apil niini ang mga regular, casual, contractual, appointive, o elective nga empleyado, bisan pa og full-time o part-time.
Apan wala malakip sa circular ang mga military ug uniformed personnel; mga ahensya sa gobyerno nga exempted sa RA No. 6758; GOCCs nga sakop sa RA No. 10149 ug EO No. 150.
Wala sab nalakip ang mga indibidwal nga walay employer-employee relationship, sama sa mga consultant, eksperto nga nagtrabaho sa limitadong panahon, job contract workers, student workers, apprentices, ug kadtong nagtrabaho ubos sa job order o contract of service.
Gituki usab sa DBM nga lahi nga circular ang maghatag ug guidelines alang sa mga local government units (LGUs) sa ilang pagpatuman sa maong salary increase. (BANAT NEWS)
- Latest
