Suspek sa pagpusil patay sa e-bike driver sikop

CEBU, Philippines — Nasikop ang usa sa mga suspetsado sa pagpusil patay sa usa ka e-bike driver diha  sa Barangay Tanke, Dakbayan sa Talisay niadtong Enero 16 niining tuiga.

Ang nasikop mao si alyas “Jovy”, 33-anyos, taga Sitio Rattan sa maong barangay.

Gikataho nga si Jovy ang nagpahibawo sa mga tanod nga adunay gipusil diha sa ilang lugar.

Apan si Police Lieutenant Colonel Epraem Paguyod, hepe sa kapolisan sa Dakbayan sa Talisay nagkanayon nga adunay kalabutan si Jovy sa maong krimen.

Kini pinaagi sa pagsubay sa footage sa closed-circuit television camera diha sa lugar ug sa mga testigos.

Giingong ang suspetsado dili maoy gunman apan kauban kini sa kriminal kinsa padayon pang gipangita sa kapolisan.

Matud ni Paguyod nga sa wala pa mahitabo ang krimen namaligya og peke nga shabu ang biktima nga si alyas “Pepo” ug mao kini ang usa sa mga anggulo nga gitan-aw nila karon nga hinungdan sa krimen.

Ug lakip sa anggulo mao nga wala maka-remit sa halin sa ilegal nga drugas ang biktima.  BDB BANAT NEWS