Querubin dili pabor sa impeachment batok ni Duterte   

CEBU, Philippines — Senatorial Political Aspirant Col. Ariel Querubin, dili pabor sa impeachment complaint batok kang Vice President Sara Duterte.

Dihang nahinabi si Querubin sa mga tigbalita dinhi sa Sugbo atol sa pagbisita niini alang sa pagtambong sa pipila ka mga kalihukan siya miingon nga dili siya pabor sa impeachment nga gitinguha sa mga magbabalaud batok sa vice president.

Kini tungod kay kun aduna man silay nakita anaa man ang Department of Justice, Ombudsman ug ang Commission on Audit nga pwede nilang ipasang-at ilang kaso.

Dugang pa niini nga ang impeachment dili parehas sa korte nga evidence based ug kini pamolitika lang.

Samtang na-obserbaran ni retired Colonel Ariel Querubin nga daghan na ang nakaila niya nga mga Sugbuanong botante.

Atol sa pag-apil niya sa Sinulog Festival niadtong Domingo nabantayan niini nga daghan na ang nakaila niya nga mga Sugbuanon samtang naglakaw sa rota sa grand parade.

Gitug-an sa senatorial aspirant nga niadtong Hulyo 2024 nakadawat siya og manifesto nga nag-awhag niya nga modagan sa May 2025 elections.

Ang maong manifesto nakakuha og 2,000 signatures ilabi na gikan sa mga Generals ug senior military officers apil na ang 25 ka four-star generals.

Ang plataporma niini mao ang gitawag nga "BET KO", nagpasabot kini sa "B" alang sa "Bigas at Busog na Tiyan" nga nagtinguhang mapalambo ang national rice production ug pag-promote og food security.

"E" alang sa Education security; "T" sa "Trabaho at Sapat na Kita"; ug KO alang sa “Korupsyon” diin tinguha niyang mapakgang. (BANAT NEWS)