Cortes nakakuha og TRO

CEBU, Philippines — Nibalik ang pagka-kulbahinam sa umaabot nga eleksyon karong Mayo sa Mandaue City human nga naibtan og dakong tunok si Mandaue City dismissed mayor Jonas Cortes ug iyang mga supporters karon nga ang Korte Suprema (SC) nagpagawas og Temporary Restraining Order (TRO) nga magpapadayon sa iyang pagpasubli pagka-mayor sa siyudad.

Ang TRO sa Korte Suprema nagpugong sa Commission on Elections (Comelec) sa pagkanselar sa iyang Certificate of Candidacy (COC) sa pagkandidato pagka mayor sa dakbayan sa umaabot nga 2025 national ug local elections.

Si Cortes niduso og Petition for Certiorari ug nangayo og TRO sa Korte Suprema niadtong Enero 2, 2025, batok sa desisyon sa Comelec nga kanselahon ang iyang COC.

Sa usa ka press briefer kagahapon sa hapon sa Enero 20, 2025 sa Supreme Court, ang tigpamaba niini miingon nga ang TRO magpugong usab sa Comelec sa pagtangtang sa ngalan ni Cortes gikan sa opisyal nga listahan sa mga kandidato para sa maong posisyon.

Gimandoan sab niini ang Comelec ug ang reklamanteng si Atty.Ervin E. Estandarte nga moduso sa ilang mga komento sa petisyon ni Cortes sulod sa 15-ka adlaw.

Tungod niini, kinahanglan nga ang ngalan ni Cortes iapil sa mga balota nga ipaprinta pag-usab sa Enero 22. Si Cortes ang ikasiyam nga kandidato nga idugang sa opisyal nga mga balota nga ipaprinta pag-usab sa Comelec.

Niadtong Enero 9, 2025, sa wala pa magdesisyon ang Comelec nga hunongon pagprinta sa mga balota para sa umaabot nga National and Local Elections (NLE), ang ngalan ni Cortes wala giapil sa lista sa mga kandidato pagka-mayor sa balota.

Tungod kini sa gipagawas sa Comelec En Banc nga Certificate of Finality ug Entry of Judgment sa ilang desisyon nga kanselahon ang Certificate of Candidacy (COC) ni Cortes, base sa 1993 Comelec Rules of Procedure.

Gikwestyon kini ni Cortes pinaagi sa pag-file og petisyon para sa Certiorari, nga naglakip sa aplikasyon para sa “Extremely Urgent Issuance of a Status Quo Ante Order and Urgent Motion for the Conduct of a Special Raffle” niadtong Enero 2, 2025.

Nagsumite usab si Cortes og petisyon alang sa Status Quo Ante Order ug Temporary Restraining Order (TRO) aron babagan ang Comelec nga ipatuman ang resolusyon nga nagkansela sa iyang COC alang sa umaabot nga 2025 midterm elections.

Si Cortes miingon nga ang desisyon sa Korte Suprema usa ka pagmatuod sa papel niini isip maoy katapusang dangpanan sa hustisya ug demokrasya.

"I urge everyone to approach this moment with sobriety and unity, allowing due process to take its course. Let us not allow this moment to divide us, but rather, inspire us to work together for the betterment of Mandaue City," matud pa ni Cortes.

Nagpasalamat sad siya sa iyang mga supporters nga padayong nagsuporta ug nagtuo kaniya kay sila ang naghatag kaniya og kusog aron ipadayon ang pagpakigbisog uban sa integridad ug determinasyon.

“Above all, I thank God, whose grace and wisdom guide us through every challenge. May we all remain steadfast in our commitment to serve Mandaue and our people with humility and love. Salamat, salamat Birhen sa Guadalupe. Salamat Snr. San Jose. Viva Pit Señor!!!”matud pa ni Cortes. (BANAT NEWS)