Siyam nadakpan tungod sa gun ban 

CEBU, Philippines — Siyam ka tawo ang nangadakpan tungod sa paglapas sa gun ban sa Cebu City ug sa Talisay City niadtong adlaw nga Domingo Enero 19,2025 atol sa pagsaulog sa Sinulog.

Sa Cebu City, nadakpan sa kapulisan sa Mambaling Police Station 11 diha sa Sitio Sto. Niño, Ibabao, Barangay Mambaling si alyas Fel, 38, stamp maker ug residente sa naasoy nga lugar human dunay nisumbong kanila nga dunay armadong tawo sa maong dapit.

Pag-abot sa dapit nasigpatan nila ang dinakpan nga nihaom sa description nga gihatag sa usa ka concerned citizen, ug dihang ilang gisitar ug gipahibawo sa report ug ni-surrender ra dayon kini.

Na-recover gikan sa suspect ang usa ka .38 Snubnose revolver nga wala'y serial number ug dunay duha ka bala.

Sunod nga nadakpan mao ang 54-anyos nga seaman nga gadala-dala gihapon og armas bisan dili otorisado diha sa Sitio Lower Kawayab, Barangay Sambag 1, siyudad sa Sugbo.

Nakadawat og tawag Abellana Police Station 2 labot sa armadong tawo sa maong lugar ug dali nilang kining giadto ug didto ila kining gidakop tungod sa paghupot og paltik nga kalibre .38 revolver nga dunay usa ka bala.

Samtang sa Talisay City, usa ka kanhi sundalo ug unom lalaki ang nasikop tungod sa paghupot og armas. Ang kanhi sundalo gidakop diha sa iyang panimay sa sitio Florida, Barangay Dumlog , Domingo sa tungang gabii pinasikad sa search warrant.

Ang suspek mao si Rosvel Enjambre alyas Rosevile, 48 , ni-AWOL sa Philippine Army nga mangingihaw og hayopan ug giingong pirmeng ireklamo kay mag-maoy.

Si Police Lt. Col. Epream Paguyod, hepe sa kapolisan sa Talisay nibutyag nga armado sila og search warrant nga giluwatan ni Judge Romeo Reyes Jr. sa RTC branch 7 sa Talisay. Nakuha gikan sa panimalay niini ang usa ka .45 kalibre nga armas nga adunay lima ka bala.

 Sa gihimong agresibong pagpatrolya nasikop sila si Leonardo Pardillo, 30, sa sitio Didos, Barangay Linao human ilang nakuhaan og .38 nga revolver nga adunay tulo ka bala.

Sa Purok Mangga, Barangay Candulawan, nadakpan si Richard Tampon, 38, nga nakuhaan og .45 pistola nga adunay tulo ka bala; Junc Villejo, 34, didto sa sitio San Miguel, Barangay Linao nga nakuhaan og .38 nga revolver nga adunay duha ka  bala; Kent Vanness Sidlakan, 20, didto sa Purok Tambis, Barangay Pooc nga nakuhaan og .357 nga revolver nga adunay duha ka bala; Rod Lee Blanza, 28, didto sa sitio Sawsawan, Barangay San Roque nga nakuhaan og .357 nga revolver ug si Justin Taneo, 20, didto sa Barangay San Roque nga nakuhaan og .22 nga revolver nga adunay upat ka mga bala.

Ang mga dinakpan gibalhug sa bilangguan nga gikatakdang pasakaan og kasong paglapas sa Comelec Gun Ban. (BANAT NEWS)