Garcia nitandi sa pagsaulog sa Sinulog sa SRP ug CCSC
CEBU, Philippines — Gikalipay ni Cebu City Mayor Raymond Alvin Garcia nga gihangop sa kinabag-an ang pagbalik sa pagpahigayon sa Sinulog Grand Ritual Showdown diha sa Cebu City Sports Center ug sa naandan nga rota pagpahigayon sa Sinulog Grand Parade diha sa sentro sa siyudad.
“Nanggawas gyud ang mga tawo. Nalipay gyud kaayo ko. Finally, the fiesta, Sinulog, is back to where it belongs!”, padayag ni Garcia.
Si Garcia nitandi sa kasaulogan niadtong niaging tuig nga gipahigayon diha sa South Road Properties ug sa pagpahigayon niini pagbalik diha sa CCSC.
“It’s more festive, it’s more enjoyable. It feels like fiesta vibes gyud. Everybody is smiling, having a good time sa ilang family and friends. Nanggawas gyud ang mga Sugbuanon”, ni Garcia pa.
Si Garcia nagkanayon nga mas nabati pa gyud karong tuiga nga pista gyud sa Siyudad sa Sugbo.
“I’m not saying nga wala na nga feel last year pero makita gyud nato nga dako gyud og diperensiya compared to last year”, padayag ni Garcia.
Nabantayan ni Garcia sa iyang pagsuroy sa kadalananug sa sulod sa CCSC nga hapsay ra ang dagan sa parada bisan nga adunay paghuot sa dagan sa trapiko tungod sa bagang duot sa mga tawo apan nadumala ra kini sa gihatasan sa seguridad.
Samtang sa sulod sa CCSC gipasirad-an na ang gate niini pasado alas 4:00 sa hapon tungod kay puno na ang grand stand.
Mapasalamaton si Garcia sa pagkooperar sa katawhan ngadto sa otoridad aron nga hapsay ang pagpahigayon sa Sinulog 2025. — /BDB (BANAT NEWS)
- Latest
