Mga siyudad, lungsod nisuspenso sa klase karon

CEBU, Philippines — Pormal na nga gi-anunsiyo ni Cebu City Mayor Raymond Alvin Garcia nga walay klase karong adlawa, Enero 20, 2025, liwas na sa kasaulogan sa kapistahan ni Senyor Santo Niño ug sa pagpahigayon sa Sinulog Grand Parade ug ritual showdown.

Matud ni Garcia nga nakita niya nga daghan ang mga tinun-an sa siyudad ang nisalmot sa Sinulog Ritual Showdown.

Gani, mga tinun-an usab ang kasagaran sa mga niboluntaryo nga maoy mobantay sa seguridad sa kapistahan ug kinahanglang hatagan kini og panahon sa pagpahuway.

Karong adlawa, subli usab nga mopasundayag ang mga mananaog sa Sinulog Grand Ritual Showdown 2025 diha sa Cebu City Sports Center.

Nunot niini, pipila sa mga lungsod ug siyudad sa Probinsiya sa Sugbo ang nideklara og suspension sa klase sa mga eskwelahan karong adlawa, Enero 20.

Ang Dakbayan sa Carcar, Mandaue ug Lapu-Lapu lakip ang Lungsod sa Carmen nianunsyo nga kanselado ang klase karon aron mahatagan og igong pahuway ang niapil sa Sinulog.

Ang maong LGUs adunay gipadala nga contingents sa Sinulog Grand Parade kagahapon.

Sa Dakbayan sa Mandaue walay klase sa tanang lebel sa pampubliko ug pribadong eskwelahan sa siyudad.

Si Lapu-Lapu City Mayor Junard "Ahong" Chan nianunsiyo usab kagahapon nga walay klase karong adlawa sa tanang lebel sa eskwehalan sa siyudad.

Ang Dakbayan sa Carcar nianunsiyo usab kini nga kanselado ang klase sa tanang lebel sa pampubliko ug pribadong eskwelahan sa siyudad aron mahatahan og adlaw sa pagpahuway ang tanang performers, propsmen, magtutudlo, support staff ug mga deboto gikan sa selebrasyon sa Sinulog.

Sa Lungsod sa Carmen, ang klase sa tanang lebel suspendido usab samtang sa mga pribadong tunghaan ang desisyon sa pagsuspenso sa klase anaa sa mga prinsipal o school head.

Samtang sa trabaho sa munisipyo matud ni Mayor Carlo Villamor padayon ang trabaho alang sa dugang pagpangandam sa umaabot nga Sinulog sa Carmen ug Suroy-Suroy Sugbo northern escapade.

Si Mayor Gerald Anthony Samsam Gullas, Jr. sa Dakbayan sa Talisay nideklara sa pagsuspenso sa klase sa karong adlawa sa tanang level sa pampubliko eskwelahan sa siyudad gawas sa Talisay City College (TCC) samtang sa mga pribadong eskwelahan nagddepende kini sa ilang school head ang pagsuspenso sa klase.

Samtang si Mayor Rajiv Enad sa Lungsod sa Minglanilla nisuspenso kini sa face to face classes karong adlaw sa mga pampublikong eskwelahan diin ang mga estudyante mopaubos una kini sa alternative delivery mode of learning. Samtang sa mga pribadong eskwelahan sa lungsod nagdepende usab sa ilang head ang pagsuspenso sa klase. — /BDB (BANAT NEWS)