1.4 miyong deboto nikuyog sa prosesyon

Bisan pa man sa kalayo ug kataas sa rota , pun-an pa sa naglagiting nga kainit sa adlaw,  bagang duot sa mga deboto ug magtutuo ang misalmot sa tinuig nga Solemn Foot Procession alang kang Senyor Sto. Niño kagahapong adlawa, Enero 18, 2025 nunot sa pagsaulog sa ika-460th nga Pista Senyor karong adlawa.

Sumala ni City Disaster Risk Reduction and Management Office (CDRRMO) Chief Aderson Comar, gibanabana nga moabot sa 1.4 milyones ka mga tawo ang nisalmot sa maong prosisyon nga gisugdan sa 1:00 sa hapon.

Nagpakita kini sa dili matarug nga pagtuo sa mga Sugbuanon ug mga dayo nga mga deboto gikan sa tanang hut-ong sa kinabuhi, maayo man o dautan ang panahon.

Nanukad kini sa Basilica Minore del Santo Niño de Cebu, paingon sa rota sa Osmeña Boulevard, General Maxilom Avenue, Imus Avenue, ug M.J. Cuenco Avenue una pa nibalik sa Basilica ug gisundan og usa ka Visperas Mass ang gihimo sa alas-6 sa gabii.

Niduyog usab sa prosisyon ang maayong panahon nga naghatag og kahulugan sa selebrasyon, samtang ang mga deboto, sul-ob ang ilang mga Sinulog shirts ug head dresses, nag-ampo, nag-awit, ug nagpakita sa ilang pagtuo ilawom naglagiting nga kainit sa adlaw.

Ang Cebu City Transportation Office (CCTO) sayo palang daan mipasira sa mga dalan padung sa rota aron walay mangatanggong nga mga sakyanan ini og abot na sa prosisyon.

Samtang duna usab presensya sa mga force multipliers sama sa Philippine National Police (PNP), Armed Forces of the Philippines (AFP), Bureau of Fire Protection (BFP), Office of Civil Defense (OCD), Reserved Officers' Training Corps (ROTC), mga estudyante sa nagkalainlaing tunghaan ubos sa National Service Training Program (NSTP) nga nagporma og human barricades dapit sa Osmeña Boulevard, ug uban pa. Sa kinatibuk-an, bisan sa maong gidaghanon sa mga tawo nga niduyog, malinayon ug nagmalampuson ang prosisyon.