Tiggamitan og drugas namusil, tulo patay

CEBU, Philippines —  Tulo ka mga tawo ang nakalas ug usa ang naangol sa nahitabong pagpamusil sa usa ka lalaki nga gituohang sabog sa ginadiling drugas  diha sa Sitio Looc, Barangay Maribago, Lapu-Lapu City, alas-8 pasado sa gabii.

Ang mga nakalas naila nga sila si Junrey Jamora, tour photographer; Mary Annn Ciño, lending collector ug usa ka naila lang sa pangalan nga Gangang Aying.

Naangol sab si Antonio Sapotalo Jr. alyas "Toto" nga construction worker.

Samtang ang suspetsado mao si Eduardo Taghoy, 40, taga sitio Jagna, Barangay Maribago sa maong siyudad nga armado og kalibre .45 nga armas nga iyang gigamit sa pagpamusil.

Tungod sa kahadlok nag-iyahay ug dagan ang mga tawo aron manago tungod sa pagtuong nagpataka og pamusil ang suspek.

Human sa pipila ka minutos nga pagpangita nasakpan sa sud sa iyang balay ang suspek kinsa giingong niangkon sa krimen. Kini nangangkon nga dunay nihunghong kaniya nga buhaton kini.

Ang suspetsado niangkon nga tiggamitan siya og ginadili nga drugas. Nabantayan sab sa mga polis nga wala magkadimao ang mga estorya niini ug mga tubag sa ilang pangutana.

Giandam na sa kapulisan ang kasong multiple murder ug illegal possession of firearms in relation to Comelec gun ban.

Nasayran sab nga tulo na ka higayon nagsulod gawas sa prisohan tungod gihapon sa ilegal nga drugas ang suspetsado.

Si Mayor Junard Ahong Chan sa Dakbayan sa Lapu-Lapu nasubo sa maong hitabo nga tungod sa ilegal nga drugas tulo ka tawo ang nakalas.

Tungod niini, hugtanong gimando ni Chan nga kinahanglang pahugtan sa barangay officials ug kapulisan ang ilang koordinasyon pagpangita ug tiggamitan og ilegal nga drugas sa ilang mga barangay.

Ang mayor nipasalig nga tanan galastohan sa pagpahiluna sa mga namatay angkonon kini sa siyudad ingon man ang naangol.

Si Chan, niangkon nga nibalik gayud ang ginadili nga drugas, gani nakita niya nga kasagaran sa rape cases karon ang mga suspetsado ubos sa impluwensiya sa ginadiling drugas ug wala na sa saktong pangisip.

Dili niya kini palabyon maong gusto niya himuong kada semana ang pagsubay sa kapulisan sa mga naa sa drug watchlist hasta kadtong mga bag-o pang nalambigit niini.