Fluvial procession dul-an 500 ang nisalmot

MANILA, Philippines —   Hapsay ug malinawon ang gipahigayon fluvial procession kagahapon nga gasugod sa alas 6:25 sa buntag gikan sa Captain Veloso Pier sa Naval Forces Central agi sa Cebu-Mactan Channel dayon liko sa Cebu-Cordova Link Expressway ug dunggo sa Pier 1. Nagkanayon si Coast Guard Cebu Station Commander Captain Jerome Lozada nga on-time ra ang fluvial procession ug ang tanang partisipante kay luwas bisan sa ginagmay nga kakuliang nahitabo.

Duna la’y mga minor glitches apan manageable ra kini, kini sama mga motorbanca nga bisan paman sa gihimong plano sa Philippine Coast Guard nga mapugngan sila sa may Pier 2, apan ni-proceed gihapon dihang ang galleon sa Balaang Batang si Sr. Sto. Niño, Birhen sa Guadalupe ug St. Jospeh nituyok sa may CCLEX. Hinoon, gitataw ni Lozada nga nabadlong ra nila ang mga motorbanca tungod kay duna man sila’y igong marshals nga gipakatap sa dapit.

Nasayran sab nga nasangad ang MV River Bus nga dunay sakay nga 58 ka pasahero ug upat ka crew duol sa Pier 1 kagahapon.

Hinoon, na-rescue ang tanang sakay sa maong motorbanca ug gi-imbestigar na sa Philippine Coast Guard ang hinungdan niini. Dul-an sa 500 ka mga barko ug sakyanan ang niapil matod pa sa fluvial procession apan si Lozada miingon nga 340 ka mga barko ug sakyanan sa dagat ang opisyal nga nagpa-rehistro. Kapin sa usa ka gatus ang ni-apil nga unregistered.

“Naay mga gagmay nga motorized banca, naa puy mga medyo dagko sad but actually sa-una okay man, hapsay man naa ra sila sa gilid ang ato lang gi problema is ang katong mga nisunod ba, katong originally nga nagsunod sa atong galleon, pagtuyok sa atong galleon diri sa may SM Seaside area nisunod sad sila so naglisod ang galleon sa pabalik sa Pier 1 but of course we were able to control it kay naa man tay mga marshals nga nag-advice sila nga mopadaplin para makaagi ang galleon,” ni Lozada pa.  Ang galleon nidunggo sa Pier 1 alas 8 gyud sa buntag ug nakuha nila ang duha ka oras nga gitagana alang sa maong kalihukan.

Grasya

Si Cebu Archbishop Jose Palma sa iyang bahin nibutyag nga grasya sa Kahitas-an tungod kay pinangga kita sa Santo Niño kay gihatagan kita og maayong panahon ug malinawon nga kalihukan.

Samtang si Guam Archbishop Ryan Jimenez, kinsa niapil sa kalihukan sa unang higayon nibutyag nga grabe iyang nakita nga pagtuo sa katawhan diin bisan taliwala sa lain-lain nga lakaw sa panahon ilabi na niadtong traslacion wala kini nakapahuyang kanila ug padayon niapil sa mga kalihukan.

Sumala pa ni Jimenez, iyaha unyang bitbiton pagbalik sa Guam ang iyang mga kasinatian sa gipakitang gugma ug pagtuo sa mga Sugbuanon nga iyang mapaambit ini og balik niya  didto. Si Jimenez miingon nga dako ang relasyon sa Guam ug Sugbo kay bisan karon naay mga molupyo didto nga ang ilang mga baptismal records dinhi gikan sa Sugbo.

Si Jimenez lumad nga taga Larena, Siquijor ug nakatrabaho kaniadto sa Sugbo personal nga nangaliyupo ug nag-ampo nga mahimo siyang instrumento sa pagpaambit sa Gugma sa Ginoo dili lang sa mga Pinoy didto sa Guam kondili sa tanan niyang mga ginsakopan sa simbahan.

Ang tigpamaba sa Basilica Minore del Sto. Niño Fr. Jules Van Almerez, nibutyag nga maayo ra ang dagan sa mga kalihukan ug wala silay nasugatan nga mga major nga problema. Gipadayag ni Almerez, tanang mga magtutuo nisabot ra usab sa mga gipatuman nga polisiya sa sulod sa simbahan.

Samtang karong adlawa mao na ang Sinulog Grand Parade,  si Police Lieutenant Colonel Maria Theresa Macatangay, Deputy City Director for Operations ug tigpamaba sa Cebu City Police Office miingon nga dul-an sa 8,000 ka mga security forces ang ilahang ipakatap aron masiguro nga hapsay ug malinawon nga mahimo ang aktibidad.