Garcia: Way signal jam karong adlawa

CEBU, Philippines —  Gipasalig ni Cebu City Mayor Raymond Garcia nga walay mahitabong signal jam karong adlawa, Enero 19, atol sa kasaulogan sa Sinulog 2025, sukwahi sa nikatap nga fake news sa social media. 

Kagahapon nikatap sa Facebook ang sayop nga impormasyon ug gi-share sa mga katawhan ang outdated na nga post nga niadto pang 2020, bahin sa pag-shutdown sa signal atol sa Sinulog.

Dali dayon kining gihimakak ni Mayor Garcia alang sa katin-awan sa tanan pinaagi sa iyang Facebook post.

“Sukwahi sa mga nikatap nga fake news sa online, walay mahitabong signal jam inig ugma (Jan 19) gani ang Cebu City Government mag provide ug FREE PUBLIC WIFI sa may Osmeña Rotunda during sa Sinulog Grand Parade 2025,'' matud ni Garcia.

Daan na nga gipahibalo ni Mayor Garcia niadtong Enero 6, nga dili siya uyon sa signal jam o putlon ang signal sa mga cellphone kay matud niya mas importante ang komunikasyon ilabi na kung dunay emerhensya panahon sa dakong kalihokan sama sa Sinulog 2025.

Kahinumduman kaniadto putlon jud ang signal isip dugang security measures pagpanalipod sa bagang duot sa katawhan, ug ang katapusang signal jamming gipatuman atol sa Sinulog Grand Celebration niadtong 2020.

Sa laing bahin, ang Radio/Rescue and Emergency Assistance Volunteer Organization (REAVO) nipamatuod usab nga dili kini mahitabo ugma pinaagi sa ilang advisory nga nag-ingon nga ang mga organizer sa Sinulog karong tuiga nikompirma nga walay signal shutdown atol sa sinulog festivities.