Fake forex trader sikop

CEBU, Philippines — Gidakop sa mga operatiba sa National Bureau of Investigation - Central Visayas Regional Office (NBI-CEVRO) ang usa ka foreign exchange trader nga walay lisensya tungod sa matud pa paglimbong niini sa mga investors pinaagi sa pagkuha sa ilang puhunan.

Ang suspetsado nailhan nga si Binglenn R. Mortalla, 33 anyos, residente sa Barangay Marigondon, Lapu-Lapu City, Cebu.  Nasikop siya sa usa ka coffee shop sa Cebu City niadtong Enero 15, 2025. 

Samtang ang mga nireklamo mao ang usa ka lalaki ug babaye nga mga negosyante nga taga Barangay Guadalupe, Cebu City. 

Matod ni Atty. Rennan Augustus Oliva, director sa NBI-CEVRO, si Mortalla nga nailhan usab isip "Bing Trader-fx" giingong mang-scam pinaagi sa online trading. 

Sa ilang imbestigasyon, nasuta nga iyang pamaagi mao ang pagsaad sa mga mamuhunan nga makadawat sila og tulo hangtod lima ka dolyar nga kita matag-adlaw kung mamuhunan sila og Php 3,000. 

Dugang pa, kung ang mamuhunan mohatag og $50, makadugang sila og kita ug ma-enroll sa "XM Trading." 

Ang XM Trading usa ka iladong kompanya sa kalibutan nga naghatag og serbisyo sa foreign exchange ug uban pa.  

"Per certification with the Securities and Exchange Commission the subject (Mortalla) is not licensed to solicit foreign investment,” matud ni Oliva. 

Gibutangan og gibug-aton sa mga otoridad nga ang pagkuha og puhunan nga dili rehistrado sa SEC  ilegal matod sa balaod.

Gipasabot usab ni Oliva nga ang scheme gihimo pinaagi sa social media sama sa Facebook ug Messenger, diin si Mortalla mo-promote sa iyang forex trading ug mamakak aron madani ang mga mamuhunan. 

Nagpahimangno si Oliva sa publiko nga magbantay kanunay kung moapil sa bisan unsang pamaagi sa pagpamuhunan ug magpakisayod sa tukma nga ahensya aron malikayan ang pagpangilad. 

Sa dihang giinterbyu si Mortalla samtang naa sa kustodiya sa NBI-CEVRO, iyang gihimakak ang mga pasangil ug mubo lang nga mitubag, "Dili na tinuod tanan." 

Si Mortalla mag-atubang sa daghang kaso, lakip na ang paglapas sa Section 8 sa Republic Act 8799 (Securities Regulation Code), Section 26 sa RA 8799 (fraudulent transactions), ug Article 315 (2) (a) sa Revised Penal Code nga may kalabotan sa Section 6 sa RA 10175 o ang Cybercrime Prevention Act of 2012.  IBM  BANAT NEWS