Kapitolyo nidonar og P33 milyones para sa Sinulog

CEBU, Philippines — Pormal na gihatag ni Gobernador Gwendolyn Garcia ang tabang pinansyal sa Probinsya sa Sugbo alang sa Sinulog 2025 nga moabot og P33 milyones.

Gitunol ni Garcia ang tseke nga nagkantidad og P33 milyones ngadto kang Cebu City Mayor Raymond Alvin Garcia kagahapon, Enero 17 diha sa buhatan sa gobernador.

Si Garcia nagkanayon nga ang maong tabang pinansyal nagpakita sa suporta sa Probinsya sa Dakbayan sa Sugbo sa pagsaulog sa Sinulog.

"Gikan sa maayong kabubut-on, and in spirit of solidarity, we are one with the City of Cebu , the Province now illustrates our commitment to our principle of governance, buhat ang pasultion, busa ania ang among tampo alang sa timailhan sa among pagsuporta..." matud sa gobernador.

Si Mayor Garcia nagpasalamat usab sa gobernador sa maong tabang nga matud niya dako ang matampo sa galastohan sa dakbayan aron magmalampuson ang Sinulog karong tuiga, hilabina nga nabalik kini sa karaang venue, Cebu City Sports Complex.

Misaksi sa paghatag sa gobernador sa maong tabang pinansyal sila si bokal Glenn Anthony Soco, Jimbo Borgonia, Mike Villamor, Daanbantayan Mayor Sun Shimura, ug Sinulog Foundation Director Elmer “Jojo” Labella.  IBM BANAT NEWS