Kapin 300,000 niduyog sa Walk with Mary

CEBU, Philippines — Nidoble ang gidaghanon sa mga nakatambong sa ug miapil sa Penitential Walk with Mary kagahapon sa kaadlawon nga niabot og kapin 300,000 nga nagsugod sa Fuente Osmeña Rotunda paingon sa Basilica Minore del Sto. Niño.

Sa wala pa gasugod ang kalihukan ang imahen sa Birhen sa Guadalupe giprosesyon gikan sa Our Lady of Guadalupe Church paingon sa Fuente.

Alas-4 sa kaadlawon gisugdan ang prosesyon nga gikuyogan sa liboan ka mga deboto sa Birhen sa Guadalupe ug sa Balaang Bata Sr. Sto. Niño.

Makita ang liboan ka mga polis, kasundalohan ug ubang force multipliers nga gipakatap aron mobantay sa seguridad sa kalihukan.

Pag-abot sa Basilica Minore del Sto. Niño usa ka santos nga misa ang gipahigayon nga gipangunahan ni Fr. Elly Suico ang Kura Paruko sa Archdiocesan Shrine of Our Lady of Guadalupe.

Si Suico nibutyag nga bisan sa taliwala sa pagsulay anaa kanunay nagtan-aw ug nigiya ang Santo Niño kay kini ang tuburan sa paglaum ug  kalingkawasan sa tanan.

Adunay madungog nga santos nga Rosaryo sa kadalanan nga gipatukar sa DyRF1215/Power Fm 89.1 diin ang mga deboto nagbitbit sa ilang mga kandila.

Ang tinuig nga Penitential Walk with Mary himoon sa ika-siyam ka adlaw sa nobernaryo subay na sa ika-460th Fiesta Señor.

Nakatampo matud pa ang maayong lakaw panahon sa pagdagsa sa mas daghang deboto kagahapon kun itandi sa Penitential Walk with Jesus nga nagsige og uwan adtong tungora.

Subay niini, si Police Lieutenant Colonel Maria Theresa Macatangay, Deputy City Director for Operations ug tigpamaba sa Cebu City Police Office hapsay ug malinawon ra ang kalihukan nga gibantayan og 1, 400 ka mga polis, ubang law enforcement agencies ug volunteers sa kalampusan sa kalihukan.

Human sa santos nga misa gisunod dayon ang traslacion diin ang mga imahen sa Birhen sa Guadalupe ug Sr. Sto. Niño gisugat sa mga opisyales sa dakbayan sa Mandaue ug gidala dayon sila sa National Shrine of St. Joseph.

Karong adlawa ilabi na sa hapon mahitabo ang solemn foot procession gilauman sa kapulisan nga mas daghang deboto gikan sa nagkalain-laing lugar ang moapil sa prosesyon maong gawas sa kapulisan, kasundalohan ug uban pa dunay 22,000 ka mga tinun-an gikan sa nagkalain-laing unibersidad ang motabang sa pagbantay sa seguridad. Rowena Capistrano, IBM BANAT NEWS