Oliva mihatag na sa iyang 13th month pay sa brgy Umapad
CEBU, Philippines — Pormal na nga gitumol ni Atty. Regal Oliva ang P125,000 nga iyang 13th month pay ngadto kang Umapad Barangay Captain Rev Cortes isip donasyon sa mga empleyado sa barangay nga wala makadawat sa pito ka bulan nilang suweldo.
Si Kapitan Cortes mipasabot nga ang maong kantidad iyang bahin-bahinon alang ngadto sa 103 nila ka mga empleyado nga nagpaabot pa gihapon nga makadawat sa ilang pito ka bulan nga honorarium sukad pa sa Enero 2024 hangtud sa Septiyembre 2024.
Sa pagkakaron suma pa ni Cortes ilang gipaabot nga ma-release ang pito ka bulan nga suweldo sa 103 nila ka mga empleyado nga gilangkoban sa barangay tanod, lupong taga pamayapa, barangay health worker; clean and green ug mga job order nga mga kawani.
Matud pa ni Kapitan Cortes nga ang bulan sa Oktubre, Nobiyembre ug Disyembre 2024 nadawat sa ilang mga kawani human ang ilang chairman sa committee on appropriation nga si Konsehal Libertin Lumapas mipirma na sa payroll.
Nanghinaut ang kapitan nga mapirmahan na ni Konsehal Lumapas ang payroll sa bulan sa Enero hangtud sa Septiyembre 2024 aron makompleto na ang usa ka tuig nga sweldo sa ilang mga kawani. MEL BANAT NEWS
- Latest
