Garcia tinguha nga makakuha og exemption sa comelec guidelines

CEBU, Philippines — Kapin sa 50,000 ka benepisyaryo sa socialized programs ang maapektuhan kon dili aprobahan sa konseho ang exemption sa Commission on Elections (COMELEC) guidelines sa eleksyon, matud ni Cebu City Mayor Raymond Alvin Garcia.

Niadtong Miyerkules, gi-defer sa konseho sa dakbayan ang pag-apruba sa resolusyon, nga gituyo aron mangayo og exemption certification aron ma-disburse ang pundo para sa dakbayan subay sa COMELEC code. Ang code nagdili sa pagpagawas sa pundo o paggasto sa mga resources sa gobyerno sa panahon sa eleksyon.

Gipasabot ni Garcia nga nakasabot siya nga nalangan ang pag-aprobar tungod sa mga kuwang nga mga dokumento nga gikinahanglan sa konseho, partikular na ang specification sa mga programa nga nagkinahanglan og exemption.

Hinuon, siya nidugang nga nanghinaot siya nga masang-at pagbalik ang resolusyon karong adlawa (Miyerkules) atol sa panahon sa regular session sa konseho. “Pero, I hope malamdagan ang council nga ma approve ang atoang request for exemption,” matud ni Garcia.

Kon dili maaprobahan, si Garcia niingon nga kinahanglang “tubagon” sa konseho ang 90,000 ka senior citizens ug 14,000 ka persons with disabilities (PWD) kansang hinabang pinansyal ma pundo sa higayon nga magsugod na ang election ban sa disbursement kun walay aprobado nga certification of exemption.

Dugang niini, ang ubang financial assistance nga posibleng maapektuhan naglakip sa burial assistance ug City Hospitalization Assistance and Medicines Program (CHAMP). Alang sa CHAMP lang, gibutyag ni Garcia nga ang dakbayan nagpagawas og labing menos P500,000 ngadto sa P1 milyones matag adlaw. Sa kinatibuk-an, gibana-bana ni Garcia nga labing menos 50,000 ka mga benepisyaryo ang maapektuhan kung dili maaprobahan ang resolusyon.

Sa mga specifications nga gipangayo sa konseho, giangkon ni Garcia nga lisod kinj tumanon, tungod kay wala pa matino ang gidaghanon sa mga benepisyaryo ug ang mga hinabang nga ilang gikinahanglan.

“Ayaw lang sad tawn mi hatagig dokumento sa beneficiaries sa burial, kay wala man mi kahiubaw kung kanus-a sila mamatay, kung kanus-a sad sila mahospital,” matod ni Garcia.

“Mao rana gyud akoang hangyo, they will really have to answer to the people if dili nila mapasar,” dugang niya

Gikataho nga sa gisugyot nga resolusyon ni Konsehal Rey Gealon niadtong Miyerkules, gilatid niini nga ubos sa Resolution No. 11060, nga giluwatan niadtong Septiyembre 13, 2024, gipahibawo sa COMELEC ang Rules and Regulations on the Prohibition Against the Release, Disbursement, o Expenditure of Public Funds alang sa mga socialized programs lakip na ang housing projects.  MEL  BANAT NEWS