Kawatan giawhag nga mosurender ug mouli sa gikawat

CEBU, Philippines — Gipanawagan ni Kapitan Clifford Jude Niñal, sa Barangay San Nicolas Proper ang kawatan nga namiktima og usa ka komprador og isda sa pag-uli sa iyang kinawat og motahan sa iyang kaugalingon.

Matud pa ni Niñal, ang biktima nga 58 anyos nidangop sa iyang buhatan kagahapon sa udto aron magpakitabang sa pagsusi sa CCTV camera tungod kay siya nabiktima sa pagpangawat dihang nakatulog kini samtang nagpaabot sa isda.

Nakita sa video sa CCTV footage samtang gikuha sa kawatan ang dili mominos P30mil sa usa ka collector ug isda nga nakatulog sa may Tupaz Street, sakop sa barangay San Nicolas Proper.

Nagkanayon si Niñal nga dili sila mohunong sa pagpangita sa suspek hangtud nga kini mabalhog sa bilangguan.

Sumala pa ni Niñal, nakita gayud nila sa CCTV Camera, ang actual nga pagkawat sa usa ka lalaki nga gihinay-hinay niini ug bitad ang kwarta nga gisulod sa plastic nga naa sa shorts sa biktima dayon sibat.

Gitug-an ni Niñal, ilang gisubay ang tanang CCTV Camera sa gipadulngan sa maong lalaki diin naagi pa kini sa ilang barangay ug nisakay ug e-bike padulong sa lain nga barangay.

Padayon ang ilang pagpangita karon ug giawhag ang maong kawatan nga motahan nalang tungod kay dili sila mohunong hangtud nga kini mapusasan. Adunay 12 oras nga gihatag ang kapitan aron motahan ang kawatan ug iuli ang nasakiyo  nga 30mil ka pesos ug gipakatap na usab ang video sa maong suspetsado.  MEL BANAT NEWS