Traffic enforcer nga mekaniko

CEBU, Philippines — Traffic enforcer sa City of Talisay-Traffic Operation Development Authority (CT-TODA) mangunay og ayo sa mga naaberyang mga motorista.

Ang mekanikong si Eduardo Alega maoy ilang tig-ayo sa mga maaberyang sakyanan diha sa kadalanan.

Kagahapon lang, usa ka ginang nga taga Dakbayan sa Sugbo ang iyang natabangan human nga nakabantay ang ginang nga lahi ang dagan sa iyang sakyanan.

Matud pa ni Alega nga sukad sa iyang pagsulod sa CT-TODA niadtong Agusto 1 tuig 2020, sobra na sa 100 ka sakyanang naaberya ang iyang natabangan sa pagpa andar og  balik.

Aduna siyay kaugalingon nga shop kaniadto hangtud nga siya gikuha sa CT-TODA  aron palapdan ilang serbisyo.

Matud pa niya nga makapalipay niya nga makakita sa pahiyom sa tawo nga iyang natabangan kay dili sab lalim nga magub-an og sakyanan diha sa tunga-tunga sa karsada.

Sa pagkakaron, si Alega motrabaho gihapon sa pagatiman og mga sakyanan ngadto sa iyang mga suki o bisan kinsa nga manawag sa iyang serbisyo ilabi na sa panahon sa iyang dayoff sa CT-TODA.  IBM BANAT NEWS