Mga miyembro sa 4Ps gidasig pag-update sa ilang profile
CEBU, Philippines — Giawhag sa Department of Social Welfare and Development (DSWD) Central Visayas ang aktibong household beneficiaries sa Pantawid Pamilyang Pilipino Program (4Ps) nga dunay mga mabdos nga miyembro o mga bata nga nag-edad og 0 ngadto sa dos anyos nga mag-update sa ilang household profiles pinaagi sa i-Registro platform.
Ang pag-update sa household profiles gihimo isip preparasyon sa nationwide implementation sa First 1,000 Days (F1KD) conditional cash grants karong tuiga, nga nagtumong sa pagsulbad sa kakuwang sa maternal ug child health, sama sa prenatal care ug nutrition, nga mahimong hinungdan sa hinay nga pagtubo ug developmental delays sa mga bata.
Ang i-Registro, o ang Dynamic Social Registry (DSR), nagtumong sa pagpadali sa pag-update sa profile sa mga mabdos ug mga bata sa 4Ps households pinaagi sa digital ug self-service platforms.
Matud ni DSWD 7 Regional Director Shalaine Marie Lucero nga dili ilisan sa i-Registro ang tradisyonal nga pen-and-paper nga proseso sa pag-update apan nagsilbi lamang kini nga digital updating platform nga magamit ilabi na alang niadtong dunay mobile device ug internet access.
Kini nagpasabot nga ang mga benepisyaryo dunay kapilian sa pag-update, mahimong manual nga pag-fill out sa Beneficiary Updating System (BUS) form 5 o sa digital nga pamaagi gamit ang i-Registro web portal, apan dili tugotan ang paggamit sa duha ka pamaagi aron malikayan ang record duplication.
Kaniadto, gidasig sa DSWD-7 ang mga benepisyaryo nga i-update ang ilang impormasyon ug contact details pinaagi sa ilang 4Ps city/municipal links (C/MLs) nga na-assign sa ilang lugar pinaagi sa pag-fill up sa BUS form.
Hangtod sa Enero 9, 2025, mga 13,806 ka mga benepisyaryo nga nag-edad og 0-2 ka tuig ang updated na ug kwalipikado alang sa FIKD conditional cash grants.
Ang i-Registro konektado usab sa Philippine National ldentification System (PhilSys) ug sa database sa 4Ps aron masiguro ang katukma, kasaligan, ug integridad sa datos. mahimong ma-access sa mga benepisyaryo ang i-Registro pinaagi niining link: htps://iregistro-4ps.dswd.gov.ph. (BANAT NEWS)
- Latest
