Ahente natagak sa 34th floor

MANILA, Philippines — Gipalawman sa Mabolo Police Station 4 sa Cebu City Police Office ang ilahang imbestigasyon mahitungod sa nahitabo sa usa ka real estate broker nga giingong natagak gikan sa ika-34 nga andana sa usa ka condominium diha sa Cardinal Rosales Avenue, Barangay Mabolo, siyudad sa Sugbo niadtong Biyernes sa hapon, Enero 10, 2025.

Nakalas sa maong hitabo si alyas Rosan, 67 anyos, nagpuyo sa L.Tudtud Street, Barangay Mabolo ning siyudad.

Nagkanayon si Police Major Romeo Caacoy Jr., hepe sa Mabolo Police Station 4 nga base sa ilang imbestigasyon giingong aksidenteng natagak ang biktima ug posible na-slide ang tiil niin.

Matod ni Caacoy nga niadto sa maong dapit ang babaye  kay duna kini buyer sa unit nga nahimutang sa maong andana.

Nakig-estorya matud pa kini sa in-charge condominium nga manghuwam og lamesa ug bangko kay mag Feng Shui kini didto ug iyaha kining gibutang sa may terrace sa maong unit.

Ang gwardiya nga si Jovie Pagobo nga duty atong tungura nakuratan nalang nga nakadungog og kusog nga lagubo.

Sa pagsusi niini, nakit-an nalang niini ang unod nga nagkatag sa yuta ug wala na mahitsura ang biktima.

“Ang assessment ani sa atong investigator kay…basin og nipatong ‘to siya unya na-slide siguro siya mao to natagak kay once katong lamesa kung moadto na ka sa ibabaw medyo alanganin naman gyud, delikado na ba,” matud ni Caacoy.

Wala sab gisalikway sa kapulisan ang posibilidad nga napalid kini sa hangin samtang nagpatong sa lamesa kay adtong higayona pwerteng kusoga sa hangin human mibundak ang kusog nga uwan.

Gisusi sab sa kapulisan ang mga CCTV sa lugar kini aron masuta kun dunay kuyog ang biktima o wala.

“Among tan-awon gyud ang tanang detalye sa CCTV kay among nakita sa CCTV siya raman gyud usa pero sige lang amo tong tan-awon gyud wala bay nigawas or wala’y laing tawo didto,” ni Caacoy pa. (BANAT NEWS)