CT-TODA moabag pagpahapsay sa kadalanan sa dakbayan sa Sugbo

CEBU, Philippines — Nipadayag sa ilang ka andam ang City of Talisay-Traffic Operation Development Authority (CT-TODA) nga motabang sa Cebu City Traffic Office (CCTO) alang sa mga kalihukan sa kapistahan sa balaang bata nga si Sr. Santo Niño.

Si Jonathan Tumulak, pangu sa CT-TODA nagkanayon nga naa ang ilang kaikag sa pagtabang sa pagpatunhay sa dagan sa trapiko karong panahona ilabi na kay siya usab deboto sa balaang bata.

Matud pa ni Tumulak nga ready ra ang ilang pwersa kung sila gikinahanglan nga mo augment ilabi na nga nahuman na ang dagko nga kalihukan alang sa Charter Day sa Talisay.

Gipanglantawan nga mas modaghan pa ang mga tawo nga modagsa dinhi sa Sugbo samtang padayon ang misa nobenaryo.

Sa pagkakaron, nagpaabot lang ang CT-TODA sa komunikasyon gikan sa CCTO kung sila magpatabang.

Hinuon siya nipasalig nga di ra maapektohan ang ilang pwersa bisan paman og mopagamit sila sa ilang sakop ngadto sa siyudad sa Sugbo. (BANAT NEWS)