Polis namatay sud sa CR

CEBU, Philippines — Patay na nga napalgan ang usa ka polis sa sulod sa comfort  room sa ilang panimalay sa Sitio Simborio sa Barangay Tayud, Lungsod sa Liloan.

Si Police Senior Master Sergeant Richard Ares, Officer-In-Charge sa Liloan Police Station ang miila sa namatay nga mao si Police Staff Sergeant Merlou Molo Mercader, nadestino  sa Traffic Enforcement Unit (TEU) sa Cebu City Police Office.

Matud pa ni Ares ang inahan sa maong polis maoy mitawag kanila bahin sa nahitabo sa anak niini.

Matud pa gikan pa sa duty ang iyang anak ug paghiabot sa ilang panimalay misulod kini sa ilang comfort room apan nahibulong kini nga taudtaud naman nga wala mogawas.

Sa iyang pagsusi nakita na lamang nga hubo kini nga nagbuy-od sa sawog nga walay panimuot.

Ang mga sakop sa Barangay Disaster Risk Reduction and    Management Office sa Tayud  midala sa maong polis ngadto sa Eversely Child Sanitarium and General Hospital sa Barangay Jagobiao sa Siyudad sa Mandaue.

Apan si Dr. Rosalie Torres sa maong tambalanan miingon nga patay na kini pagabot kanila. Gisusi pa kun unsay hinungdan sa iyang kamatayon.

Si Mercader mao na ang ikaduhang polis sa Sugbu nga nakabsan sa kinabuhi ning buwan sa Enero.

Unang namatay sud sa lawas sa iyang opisina ang hepe sa Tabogon Police Station nga si Police Lt. Colonel Glenn Hife niadtong niaging semana. IBM BANAT NEWS