196 ka sakyanang pangdagat ang nakaparehistro

CEBU, Philippines — Niabot na ngadto sa 196 ka sakyanang pangdagat ang nakaparehistro sa Philippine Coast Guard nga buot moapil sa umaabot nga fluvial procession.

Kini ang gipahibalo ni Ensign Abel Lomboy, tigpamaba sa Philippine Coast Guard Central Visayas.

Ang maong gidaghanon natala kini usa ka adlaw sa dili pa ang gikatakda nga kataposan nga pagpanawat sa registration kagahapon, Biyernes Enero 10, 2025.

Ang mga narehistro nga sakyanang pangdagat gilangkuban sa tulo ka Cargo Vessel; 136 ka MBCA; 22 ka passenger vessel/cargo; tulo ka recreational vessel; siyam ka speed boat; 15 ka MTUG; pito ka yate ug usa ka service boat.  Ang pagpanawat sa registration kagahapon kutob lang sa alas 5:00 sa hapon ug wala pay gipahibalo kong aduna pa ba kini extension.

Subay niini, nipahigayon og site inspection ang PCG sa Mactan Channel isip pagpangandam sa umaabot nga fluvial procession.

Si Commodore Weniel Azcuna, sa Coast Guard District Central Visayas maoy nangulo sa gihimo nga site inspection kagahapon sa buntag.

Lakip sa ilang gitan-aw ang mga area kon asa magsugod ug mahuman ang fluvial procession aron masiguro nga hapsay ug malinawon ang maong kalihokan.  Decemay P. Padilla/BDB BANAT NEWS