P10 milyones shabu nasakmit

CEBU, Philippines — Wala madayon og deliver sa dalang drugas ang usa ka 42-anyos nga lalake human siya nadakpan sa buy-bust operation sa City Intelligence Unit/City Drug Enforcement Unit sa Mandaue City Police Office sa FE Zuellig, Barangay Subangdaku, Dakbayan sa Mandaue, Miyekules sa gabii, Enero 7, 2025.

Ang nadakpan mao si Reymond Victoriano Ochea, 42, usa ka high value individual ug nagpuyo sa Sitio Bugwak, Barangay San Vicente, Lungsod sa Liloan.  Nasakmit gikan sa suspetsado ang 1.5 kilos nga shabu nga nagkantidad og P10.2 million.

Sa impormasyon sa kapulisan dili lang siyudad sa Mandaue apan apil na ang Lungsod sa Consolacion ug Liloan ang operasyon niini. Matod pa maka dispose ang suspect og tulo ngadto sa upat ka kilo nga shabu kada buwan.

Sa laing operasyon, nadakpan sa mga operatiba sa Waterfront Police Station 3 Cebu City Police Office ang usa ka durugista ug nakuhaan pa gyud og armas atol sa ilang buy-bust operation sa Sitio Lomboy, Barangay San Roque, dakbayan sa Sugbo, Miyerkules sa gabii, Enero 8, 2025. Ang nadakpan mao si Earl John Tupas alyas Dan-dan, 21, taga Sitio Susco, Barangay Guadalupe ning siyudad.  Nasakmit sa mga operatiba ang 5 gramos sa illegal nga drugas nga nagkantidad og P34,000 ug kalibre .38 nga revolver.

Sa laing bahin,  usa ka drug den ang gibungkag ug tulo ka indibidwal ang nadakpan atol sa buy-bust operation sa mga operatiba sa Philippine Drug Enforcement Agency(PDEA)-7 ug Cebu City Police Station 10 sa Sitio Sto. Rosario, Barangay Labangon, siyudad sa Sugbo, Miyekules sa gabii, Enero 8, 2025.

Ang nadakpan mao ang subject sa operasyon ug drug den maintainer nga si alyas Harry, 33 anyos, construction worker ug nagpuyo sa naasoy nga dapit.

Nasikop sab ang duha ka tigbisitahan sa drug den nga sila si alyas Renante, 29 anyos, nagpuyo a Barangay Labangon ug si alyas Joseph, 42 anyos, negosyante ug taga Ipil, Zamboanga Sibugay.

Nasakmitan ang mga suspetsado og pito ka putos sa gituohang shabu nga nitimbang og 11 gramos ug nagkantidad og P74,800, buy-bust money, kwarta nga P150 ug nagkalain-laing drug paraphernalia.

Ang tanang nadakpan pasakaan og kasong kalapasan sa Sections 5, 6, 11, 12 ug 15, Article II sa Republic Act 9165 ang ipasaka batok sa mga suspetsado.

Gihulagway sa PDEA-7 nga ang drug dens kay tinubdan sa kasamok ug mga krimen nga makabalda sa kahapsay ug kalinaw sa komunidad. Romeo Marantal, IBM BANAT NEWS