Asawa gidunggab sa bana

CEBU, Philippines — Nakaangkon og samad dinunggaban sa nagkadaiyang parte sa lawas ang usa ka asawa human kini dunggaba sa seloso nga bana diha sa Sitio Damoyog, Barangay Caliongan, Lungsod sa Dalaguete niadtong Martes sa hapon.

Ang biktima mao si Nela Bedico Amancio, 42-anyos samtang ang bana mao si Leon Amancio, 48-anyos, mag-uuma.

Ang biktima nakaangkon og unom ka samad dinunggaban sa nagkadaiyang parte sa lawas. 

Base sa imbestigasyon sa Dalaguete Police Station ang biktima nibutyag nga seloso kaayo ang iyahang bana.

Ug tungod sa pagsige og selos sa iyang bana gipasakaan niya kini og kasong psychological abuse niadtong buwan sa Disyembre sa niaging tuig.

Sa wala pa nahitabo ang pagpanunggab giingong ang biktima nanilhig sa ilang tugkaran ug nakita niini nga nagpadulong ang iyahang bana hinungdan nga nidagan kini paingon sa sulod sa ilang balay.

Apan naablihan sa bana ang pultahan tungod kay kusgan kini ug gidunggab sa sispetsado ang biktima.

Ang pagpasaka og kaso sa asawa giingong maoy naka-trigger sa bana nga patyon ang iyahang asawa tungod kay gasige kini og pangayo og pasaylo apan gipadayon sa biktima ang kaso.  Giingong ang suspetsado naglagot nga wala na tagda sa iyang asawa.

Nasayran nga ang biktima ug suspetsado aduna kini pito ka anak.

Giandam na sa kapolisan ang kasong frustrated parricide nga ipasaka batok sa suspetsado.

Sa laing bahin,  nadakpan  sa kapolisan  ang walo sa siyam ka tawo nga gilangkuban sa tulo ka hingkod ug lima ka menor nga mga suspetsado  sa pagpanunggab sa usa ka 38 -anyos nga lalaki  sa Barangay Pajo, Siyudad sa Lapu-Lapu

Nahitabo ang maong pagpanunggab niadtong Enero 5, 2025 sa gabii diha sa PUJ  terminal  kinsa ang biktima nga giila lang nga si “Tatay Nognog” ang nakabaton og daghang samad dinungggaban sa iyang lawas ang anaa npa karon sa tambalanan sa Siyudad sa Sugbo.

Ang igsuon sa biktima nangayo kini og tabang kang Mayor Junard "Ahong” Chan hinungdan  nga usa sa mga suspetsado nga menor de edad  ang unang nitahan diha sa buhatan ni Chan ug maoy nag-ila sa iyang mga kauban hinungdan nga nadakpan kini sa kapolisan.

Ang tulo ka hingkod gitanggong karon sa holdng facility sa Lapu-Lapu  City Police Office (LCPO) ug  ang lima ka menor gitugyan ngadto sa Home Care Facility sa  Barangay Gun-ob  sa maong siyudad.

Si Police Lieutenant Colonel Christian Torres, tigpamaba sa LCPO nagkanayon  nga  usa pa sa mga suspetsado sa maong pagpanunggab ang  wala madakpi ug padayon pa ang ilang pagpangita niini.

Kasong frustrated homicide ang ipasaka batok sa mga suspetsado.

Dugang ni Torres nga tungod  sa maong insidente ibalik na usab nila ang pagpatrolya ug pagsita sa mga menor de edad nga magsuroy-suroy  pnahon sa gabii. —ug Romeo T. Limpangog/BDB BANAT NEWS