Hepe sa Tuburan Police Station namatay

CEBU, Philippines — Patay na nga napalgan sulod sa iyahang opisina si Police Lieutenant Colonel Glenn Hife, ang hepe sa Tuburan Municipal Police Station niadtong Sabado sa hapon, Enero 4, 2025 sa Barangay 6 sa maong lungsod.

Sa impormasyon sa Tuburan Police Station si Police Executive Master Sergeant Gregorio Licanyan, gikataho nga mimando sa duty Desk Officer Police Staff Sergeant Ken Sungahid sa pagsusi sa ilang hepe tungod dili kini motubag sa tawag, message ingon man sa ilang group chat.

Gawas niini, daan na silang nabalaka sa ilang hepe tungod kay nagmulo na kining daan sa kasakit sa tiyan sa buntag pa.

Si Sungahid nigamit og duplicate sa yawe aron ablihan ang kwarto ni ug didto iyahang nakit-an ang opisyal nga naglingkod ibabaw sa higdanan niini nga nagtikuko, nagsul-ob og blue nga sleeveless ug boxer shorts.

Dihang ilang gisangpit wala na kini motubag ug wala na sab maglihok ug nigahi na og lahi na sab ang kolor sa panit niini.

Dali dayon sila nanawag sa ANDAM Tuburan Responder Teams aron ma-revive si Hife apan gideklarar kining patay pag-abot sa Tuburan District Hospital.

Hinoon ipaubos matod pa sa autopsy ang patay'ng lawas sa opisyal aron masayran ang tinud-anay nga hitabo.

Si Hife, nagpangidaron og 51-anyos ug taga Barangay Pusok, dakbayan sa Lapu-Lapu.

Nasulod kini sa serbisyo niadtong September 9, 1996.  Gawas sa pagka hepe niini sa Tuburan Police Station, nahimo sab siyang hepe sa Police Strategy Management Unit sa Cebu Police Provincial Office ug hepe sa Balamban Police Station ug uban pa. — /IBM (BANAT NEWS)