Bag-ong direktor sa CPPO mopatuman og bag-ong pamaagi
CEBU, Philippines — Milingkod na ang bag-ong Provincial Director sa Cebu Police Provincial Office(CPPO) nga si Police Colonel Jovito Anatacio nga gipaabot nga magdala og mga bag-ong ideya ug mopatuman og mga kausaban sa pakigbatok sa kriminalidad ug pagprotihir sa katawhan.
Si Anatacio mihulip kang Police Colonel Percibal Zorilla, matud pa mosentro sa iyang gitawag og “Triumvirate Approach” nga diin dunay lawom nga kolaborasyon ang kapolisan ngadto sa komunidad ug mga LGUs aron pagmentinar sa kahapsay ug kalinaw sa tibuok probinsya.
Kini misaad nga kutob sa mahimo himo siya og mga desisyon nga maoy haom sa matag sitwasyon ug patas nga pagpatuman sa balaod.
Malaumon ang bag-ong hepe nga pinaagi sa iyang bag-ong gidalang estrahiya mas mahimong aktibo ang tanang sektor pagsuporta sa mga kampanya sa kapolisan batok sa tanang matang sa krimen ug pagpatuman og mga serbisyo para sa katilingban.
Si Anatacio kanhi hepe sa Regional Personnel and Records Management Division sa Police Regional Office-7 ug sakop siya sa Philippine National Police Academy Class of 1998.
- Latest
