Presyo sa tour package sa Suroy-Suroy tinguhang paubsan

CEBU, Philippines — Buot ni Gobernador Gwendolyn Garcia nga mapaubsan ang presyo sa tour package sa Suroy-Suroy Sugbo.

Kini aron mahatagan og higayon ang uban nga limitado ra ang budget apan gusto  nga moapil sa maong tourism caravan sa Probinsiya sa Sugbo.  Matud ni Garcia nga makigtigom siya sa mga tag-iya sa resorts aron mahatagan sila og diskwento.

"Lain lain man ta'g presyo, pero suwayan nako nga mangayo ko’g discounts sa mga resorts nga tagai mi'g discounts kay total maayo man ni og kada adlaw, para man ni once a year, makabawi man mo ana sa pagpa-promote sa inyong mga rooms", matud sa gobernador atol sa live press conference kagahapon diha sa iyang buhatan sa Kapitolyo.

Ang rate o presyo sa Suroy-Suroy Sugbo tour package magdepende sa accommodation sa mga guest.

Kasagaran ang presyo moabot sa P11 mil sulod sa pipila ka adlaw nga tour libre na ang amenities, travel kits, accommodation, transportation ug uban pa.

Kagahapon nipahigayon si Garcia og coordination meeting uban sa mga stakeholders alang sa laing hugna sa Suroy-Suroy Sugbo didto sa norte.

Ang Suroy-Suroy Sugbo Northern Escapade ipahigayon sa Enero 23 ngadto sa 25 ngadto sa mga lungsod sa Norte apil niini ang Bantayan Island. Gimandoan na ni Garcia ang tourism office nga pangitaon ang mga hotel ug resort nga nakakuha og maayong rating sa mga travel websites aron maapil sa ilang listahan sa mga resorts nga i-book alang sa mga bisita.

Kini aron nga daghan ang maatiman ug mapuy-an sa mga partisipante sa Suroy-Suroy hilabina nga ang Northern Escapade maoy kasagaran ang dako nga delegasyon tungod kay moapil niini ang mga Sugboanon ug ubang mga bisita nga mouli ug mobisita sa Sugbo aron mosaksi sa Sinulog. BDB BANAT NEWS