42 lang ka contingents ang final nga makaapil sa Sinulog Grand Parade

CEBU, Philippines — Niabot sa 42 ka contingent gikan sa nagkadaiyang dapit sa nasud ang mosalmot sa Sinulog Grand Parade 2025 matud ni Jojo Labella, executive director sa Sinulog Foundation Inc.

Matud ni Labella nga padayon ang paghan-ay karon sa Sinulog Foundation alang sa umaabot nga dakong kulturanhong kalihokan sa Dakbayan sa Sugbo nga mao ang Sinulog Grand Parade 2025.

Gibutyag ni Labella nga kutob lang sa 42 ka contingent ang final nga makasalmot sa Sinulog Grand Parade nga mas daghan kon ikompara sa nakalabay nga katuigan.

Naglakip kini sa 11 ka out of town contingents diin sa labing unang higayon adunay naggikan sa Luzon nga moapil.

Si Labella nihulagway nga adunay nationwide presentation ang sinulog Grand Parade karong tuiga.

Samtang ang Sinulog sa Kabataan sa Dakbayan nalang ang masaksihan sa Enero 12, 2025 nga manukad sa Barangay Mabolo ug giklaro sa SFI nga molahos na sa Sinulog Grand Parade ang napiling morepresentar sa Sinulog sa Kabataan sa lalawigan nga adunay 10 ka contingents.

Si Labella nagkanayon nga bag-ong flavor karon sa Sinulog ang brass band nga adunay 12 ka contingents.

Subay niini, sa labing unang higayon sa kasaysayan sa Sinulog ang upat ka lungsod sa Isla sa Camotes nagkahiusa alang sa pagpadala og usa ka contingent nga moapil sa umaabot nga Sinulog Grand Parade. Dul-an sa 400 ka performers gikan sa mga lungsod sa San Francisco, Poro, Tudela ug Pilar ang mopasundayag sa Sinulog ug morepresentar sa “One Enchanting Camotes” nga contingent.

Matag LGU nipadala kini sa ilang dancers ug propsmen aron molangkub sa grupo.

Sa pagkakaron, padayon ang pag-ensayo sa contingent didto sa gym sa Lungsod sa Tudela nga maoy host nga LGU.

 Nasayran nga ang matag usa ka lungsod nag-amot-amot alang sa pag-umol sa ilang presentasyon.

Gawas sa pundo nga gikan sa upat ka LGU aduna subsidy usab gikan sa Kapitolyo ug Sinulog Foundation Inc. alang sa ilang preparasyon.

Ug aron makadaginot sa logistics ang mga props ug ubang materiyales nga gigamit sa mga lungsod sa niaging tuig nga Pasigarbo sa Sugbo mao na usab karon ang gigamit aron mapahimuslan pag-ayo sa contingent.

Ang Camotes contingent moapil sa free interpretation category sa Sinulog Grand Parade. Le Phyllis F. Antojado/BDB BANAT NEWS