Asawa gidunggab sa bana patay, laing ginang patay usab sa hitabo

CEBU, Philippines — Patay ang usa ka 42-anyos nga babaye human kini dunggaba sa iyahang bana sulod sa modern jeepney niadtong Sabado sa gabii diha sa Barangay Ibo, Dakbayan sa Lapu-Lapu.

Ang biktima lumad nga taga Lungsod sa Argao apan kasamtangan nga nagpuyo sa Sitio Mahayahay, Barangay Bankal sa maong siyudad samtang ang suspetsado usa ka 44-anyos, molupyo sa Barangay Maribago sa samang siyudad.

Matud ni Police Lieutenant Colonel Christian Torres, tigpamaba sa Lapu-Lapu City Police Office nga ang biktima ug suspetsado 12 ka tuig na nga buwag.

Apan bisan pa niini giingong ang bana sekretong nisunod sa iyahang asawa aron pagsuta kon aduna kini bag-ong hinigugma.

Sa wala pa ang insidente giingong ang biktima nisakay og modern jeepney diha sa Parkmall, Dakbayan sa Mandaue ug giingong ang bana nisunod ug nisakay usab sa maong modern jeepney.

"Giingnan pa gani sa asawa ang driver nga ayaw na pasakya", matud ni Torres.

Dihang naabot sila sa naasoy nga dapit kalit nga gidunggab sa bana ang iyang asawa gamit ang hait nga hinagiban.

Ang biktima nakaangkon kini og unom ka samad dinunggaban sa nagkadaiyang parte sa lawas.

Nakamugna og tensiyon ug komosyon ang maong hitabo hinungdan nga ang usa ka 53-anyos nga pasaherong babaye ang namatay usab human giatake sa kasing-kasing samtang nisuway og kanaog gikan sa modern jeepney.

Giingong ang 53-anyos nga babaye ang nisuka og dugo sa wala pa namatay.

Human sa insidente ang suspetsado dali kining nisibat pahilayo sa lugar apan nasikop kini diha sa iyang gitrabahoan nga pribadong eskwelahan sa Dakbayan sa Mandaue kagahapon sa kadlawon atol sa hot pursuit operation sa kapolisan.

Gihimakak sa suspetsado ang pasangil ug nangangkon kini nga anaa siya sa iyahang trabahoan dihang nahitabo ang insidente kay nag-Christmas party apan positibo kining gitudlo sa drayber ug konduktor sa modern jeep nga maoy nagbuhat sa krimen.

Gisusi usab sa kapolisan ang taho nga ang drayber sa modern jeepney ug biktima giingong adunay relasyon  Ang suspetsado natingkagol karon sa detention facility sa LCPO ug gikatakda nga pasakaan og kasong parricide. — /BDB (BANAT NEWS)