Duha ka durugista nasakmitan og minilyong shabu

CEBU, Philippines — Nasikop ang usa ka high value individual atol sa buy-bust operation sa Provincial Intelligence-Police Drug Enforcement Unit sa Cebu Police Provincial Office(CPPO) sa Purok Lambay, Barangay San Roque, Dakbayan sa Talisay.

Ang suspetsado mao si Giovani Derrayal Enriquez alyas “Vani”, 43-anyos, minyo, nagpuyo sa Barangay Inayawan, Siyudad sa Sugbo.

Nasakmit sa kapolisan gikan sa suspetsado og 150 gramo nga shabu nga nikantidad og kapin sa P1 milyon.

Nasayran nga gipaubos sa duha ka semana nga monitoring ang suspetsado ug nasuta nga maka-dispose kini og 200 gramo nga shabu kada semana.

Giingong sa Dakbayan sa Talisay ang area of distribution niini ug nasayran usab nga gikan sa Abuyog ang tinubdan sa ilegal nga drugas sa suspetsado.

Sa laing bahin, nasikop usab atol sa buy-bust operation sa mga operatiba sa Provincial Intelligence Unit-Police Drug Enforcement Unit ug Tagbilaran City Police Station sa Bohol Police Provincial Office ang usa ka 33-anyos nga lalaki ug nasakmitan kini og 300 gramo nga shabu nga nikantidad ngadto sa P2 milyones didto sa Purok 3, Barangay Cabawan, Tagbilara City.

Ang nasikop mao si Raymon Martin Rex Alo alyas “Tonton”, 33-anyos, minyo, walay trabaho, nagpuyo sa Purok 5, Barangay Tiptip, Tagbilaran City.

Giingong anaa sa prisohan ang contact sa suspetsado sa ilegal nga kalihokan niini.

Nasayran nga ang suspetsado nadakpan na kini niadtong tuig 2020 gumikan gihapon sa pagkalambigit sa ginadiling drugas. Giingong maka-dispose ang suspetsado og 200 ngadto sa 300 gramo nga shabu ug dili lang Tagbilaran City ang area of disposal niini apil na ang mga silingang munisipalidad sa unang distrito sa Bohol. — /BDB (BANAT NEWS)