Pagbukas sa Jubilee Year 2025 GISALMOTAN sa libuan ka tawo

CEBU, Philippines — Liboan ka mga magtutuo ang nagtapok kagahapon adlaw nga Domingo sa upat ka mga dapit sa Sugbo alang sa pagbukas sa Jubilee Year 2025 uban sa tema Pilgrim of Hope.

Ang upat ka mga dapit nga adunay pagbukas sa Jubilee Year 2025 sa Cebu City nanukad gikan sa Cebu Provincial Capitol ngadto na sa Cebu Metropolitan Cathedral, Sa South sa Archdiocesan Shrine of St. Catherine de Alexandria sa Dakbayan sa Carcar.

Samtang sa North sa Santo Tomas de Villanueva Parish sa Dakbayan sa Danao ug St. Peter Parish Bantayan Island.

Sa Dakbayan sa Sugbo nangulo si Cebu Archbishop Jose Palma nga gitambongan sa nagkadaiyang mandated organizations, kaparian, government officials ug mga layko.

Si Palma ang nangu sa gihimong liturgical celebration sa Jubilee Year diha sa Cebu Provincial Capitol Grounds diin gihimo ang Collectio.

Ang Collectio naglakip sa antiphon kun opening chant, ug invitation to bless and praise God, ingon man pag-ampo alang sa proclamation sa gospel passage.

Gisugdan ang procession wala pay alas kwatro sa hapon ug gitapos sa usa ka santos nga misa diha sa Cebu Metropolitan Cathedral.

Matud pa sa Arsobispo nga dako niyang pasalamat ug kalipay nga gihatagan ug maayong panahon ang pagbukas sa Jubilee Year 2025 ug gihugopan sa bagang duot sa katawhan.

Dugang pa niya nga adunay daghan nga kalihukan nga giandam alang sa usa ka tuig nga selebrasyon sa Jubilee Year. — /MEL (BANAT NEWS)