Lingin nga prutas gihugopan sa mamalitay sa Carbon

CEBU, Philippines — Daghan gihapon ang nagtuo og mga palihi panahon sa pagsugat sa Bag-ong Tuig, apil na niini ang pagpalit og mga lingin nga prutas.

Duha ka adlaw sa dili pa hingpit sugaton ang bag-ong tuig, mihugop na ang katawhan sa Carbon Public Market kagahapon Domingo, December 29, 2024 aron mangompra og prutas nga lingin-lingin alang sa palihi sa pagsugat sa bag-ong tuig.

Sumala pa sa usa ka ginang nga taga Mabolo, mas sayo siya mamalit ug pilion usab niya kadtong dili dayon madaut kay barato pa man ug igo-igoon ra usab niya ang iyang kwarta.

Dugang pa sa maong ginang, matag sugat sa bag-ong tuig naandan na gayud niya ug nasunod sa iyang ginikanan nga magbutang sa lamesa ug mga prutas nga dili parehas ang ihap tungod kay aron daw adunay grasya nga madawat.

Gitug-an sa ginang, bisan taliwala sa iyang mga pagpangandam hugot nga pag-ampo gihapon maoy iyang gituohan ug gihuptan ug dayan-dayan nalang ang pagpalihi nga maoy iyang namat-an.

Sa pagsubay sa Banat News sa Carbon Market ang mga lingin-lingin nga prutas sama sa apple nagsugod ang presyo sa P15 pataas, kiat-kiat-P80 ngadto sa P100, apple P15-25; melon-P100/kilo, pakwan-P50/kilo; mani P50, 75,100,150 ang lata; grapes P120 matag kilo.

Pipila sa mga tindera ang nibutyag nga posibleng mosaka pa ang mga presyo sa prutas ilabi na mosaka man usab ang ilang komprada sa nagsingabot na ang adlaw sa pagsugat sa bag-ong tuig.

Naglakip sa mga palihi nga pagahimoon sa paghagtik gayod sa takna nga alas 12 sa tungang gabii mao ang pagpakagay sa 12 ka buok kuwarta nga sinsiyo isip pagkabig sa suwerte.

Ang dili paggasto og kuwarta sa pagsugat sa bag-ong tuig kabahin na sa mga pagpalihi nga maoy hinungdan nga ang pipila namalit na daan sa wala pa ang Bag-ong Tuig.

Apil na usab ang pagsaba-saba pinaagi sa pagdokdok og takob sa kaldero o lata isip pag-abog sa mga dautang espirito, ang pag-abli sa mga bintana o mga pultahan sa panimalay ug uban pa. — /MEL (BANAT NEWS)