78-anyos patay sa Bakus ni Hudas
CEBU, Philippines — Patay ang usa ka 78- anyos nga lalaki human siya gikatahong naunay sa gidagkotang Bakus ni Hudas o Judas Belt samtang dugang upat sab ka mga tawo ang nadugang sa talaan sa mga nangaangol tungod sa pabuto kagahapong adlawa, Sabado, hinungdan nga niabot na og 125 ang nabiktima niini sumala pa sa Department of Health.
Niadtong Disyembre 27, ang DOH nakatala pa lang og 101 fireworks-related injuries, apan sa pagabot-abot na sa ubang mga reports gikan sa nagkadaiyang tambalanan sa tibuok nasud nagkaanam sab og saka ang gidaghanon sa mga nabiktima.
Ang nahitabo sa senior citizen gikan sa Central Luzon mao ang pinakaunang kaso nga namatay sa pabuto karong tuiga sumala pa ni Health Assistant Secretary ug DOH Spokesperson Albert Domingo sa interbyu kaniya sa Teleradyo Serbisyo.
"Mayroon tayong first reported death, isang 78 years old na lolo na gumamit ng Judas' Belt. Hindi siya iligal na fireworks,"pagklaro pa niya.
Ang maong biktima niadto pa diayng Disyembre 22 nabuthan sa iyang gidagkotang pabuto, apan samtang kini gi-admit sa tambalanan namatay kini pagka-adlaw nga Biyernes , Disyembre 27.
Gibutyag sa DOH nga sa natala nga nabuthan, ang 102 nila mga menor de edad diin ang uban nangapungkol gyud ang mga tudlo, dunay nabuthan sa mga mata, dunay nangabungol tungod sa kakusog sa buto.
"Ito 'yung mga bahagi ng katawan na tinamaan — ang mata ay halos kalahating porsyento. Sumunod ang kamay, ulo, tapos ang ating mga hita at mga braso. Mayroon na pong pito ang nagkaroon ng amputation," dugang pa ni Domingo.
Base sa maong talaan gikan Disyembre 21 hangtud Disyembre 28, mas daghan kini kun itandi sa nakalabay nga tuig nga niabot lang og 97 ka kaso.
Hinuon sa tuig 2023 gikan Disyembre 21 hangtud Enero 1, 2024 dunay kinatibuk-ang 231 ka tawo nga nabiktima sa pabuto sumala pa sa DOH.
Subli karong nanawagan ang DOH sa publiko nga walay laing pamaagi aron mahunong kining mga kaso sa mabuthan sa pabuto kondili ang paghunong na sa paggamit niini. (BANAT NEWS)
- Latest
