Sa porn sites gisunod sa tulo ka bata ang paglugos sa 8-anyos

CEBU, Philippines — Gihulagway sa Toledo City Police Station nga alarming ang nahitabo sa usa ka 8-anyos nga batang babaye nga giingong gitabangan og among-among sa tulo ka mga menor de edad usab nga mga bata sa usa ka bukirang barangay sa maong siyudad niadtong December 20, 2024.

Una nang na report nga giangkon sa tulo ka menor de edad nga pagamong-among nila sa 8-anyos ilaha kining gisunod sa nakit-an nilang salidad sa usa ka pornsite sa internet.

Matud pa adto magtan-awan ang mga menor de edad sa computer sa balay sa usa sa mga gipasanginlan nga giingong kabanay ra sa biktima.

Si Police Lieutenant Colonel Wilfredo Alarcon Jr., hepe sa Toledo City Police Office mibutyag nga gitugyan nila sa Department of Social Welfare and Development ang maong hitabo sanglit pulos mga menor de edad ang mga nalambigit.

"Actually, very alarming na siya bisag kami sa PNP wala gyud mi mabuhat ani kay dili sad mi ka implementar sa balaod ani kay tungod minor ang offenders, minor pud ang rape victim so gi refer gyud ni namo sa DSWD," sigon ni Alarcon.

Gitataw hinoon ni Alarcon nga kun unsa may mga rekomendasyon sa DSWD mahitungod sa pagpatuman sa balaod labot sa hitabo maoy ilang hatagan og prayoridad.

Nunot sa maong hitabo, dunay intervention nga gihimo ang kapulisan sa dakbayan sama sa pagmando sa Police sa Barangay ug sa Beat ug Mobile Patrollers nga kun makaadto og mga lugar nga dunay mga computer shop sa pag-check kun dunay mga menor de edad ilabi na kun lawom na ang kagabhion.

Kini tungod kay estrikto ang ilang pagpatuman sa curfew ordinance sa siyudad sa Toledo.

Makig-alayon sab ang Toledo City Police Station sa Business Permit and Licensing Office sa Local Government Unit aron kadtong mga nag negosyo og internet cafe nga molapas sa balaod mapahamtangan og silot sama sa pagkanselar sa ilang permit.

"Ug naa mi makit-an ana amo gyud na himoan og report together with Business and Licensing Office sa Local Government Unit amo na siyang adtuon, amo na siya i call ang attention sa BPLO nga immediately amo na siya na i-recommend for kanang isira or ang BPLO mismo ang ko revoke anang permit nga gi allow aning mga internet cafe nga mo allow nga maka access ang mga bata og pornsites," pasidaan pa ni Alarcon.   IBA BANAT NEWS