Mga PDL nagsaulog sa pasko uban sa pamilya

CEBU, Philippines — Ang mga Persons Deprived of Liberty (PDL) sa Cebu City Jail Male Dormitory wala magmingaw ang ilang pasko human gitugotan sila nga makauban sa ilang mga mahal sa kinabuhi nga magkasaulog sa pasko.

Usa ka dalaw ang nipdayag sa iyang dakong kalipay kauban ang iyang pamilya diin bisan sa mubo nga panahon nakauban niya ang iyang bana ug anak nga parehong PDL.

Bitbit sa maong ginang ang salin sa ilang noche buena nga saw-an usab nila kong makasulod sila sa pasilidad.

Atol sa pasko taas nga linya sa mga dalaw ang nagpaabot sa gawas alang sa ilang turno nga makasulod sa jail facility.

Si Jail Chief Inspector Mark Toñacao, assistant warden sa Cebu City Jail Male Dormitory nipasabot nga hinay ang ilang proseso sa pagpasulod sa mga dalaw tungod kay gisiguro nga walay kontrabando nga makasulod hinungdan nga kuti ang ilang pagsuhid sa mga dalaw apil na ang mga dala sa mga mobisita.

Ang Cebu City Jail Male Dormitory adunay kapin sa 4,000 ka PDL nga nagpaabot sa ilang pamilya nga mopatim-aw sa mga espesyal nga okasyon sama sa pasko ug bag-ong tuig.

Samtang adunay 150 ka PDL ang nahatagan sa ilang kagawasan niadtong nakalabay’ng semana human naka-avail sa good conduct time allowance (GCTA).

Ang maong nahatagan og kagawasan pinaagi sa GCTA mao kadtong mga PDL nga nagtinarong sulod sa bilanggoan. BDB BANAT NEWS