4 ka lalaki nga niamong-among sa dalagita sikop

CEBU, Philippines — Nadakpan atol sa gipahigayong operasyon sa Criminal Investigation and Detection Group Cebu City, Provincial Field Unit ug Oslob Municipal Police Station ang upat ka lalaki nga giingong niamong-among sa 15-anyos nga dalagita sa Barangay Casay, Lungsod sa Dalaguete niadtong Dominggo sa gabii.

Ang mga suspetsado nagpangedaron og 18, 19 ug 20-anyos, mga residente sa Barangay Casay ug Barangay Tuba, Lungsod sa Dalaguete.

Nasayran nga duha sa mga suspetsado magsuon samtang ang uban ilang mga barkada.

Niadtong Disyembre 9, 2024, atol sa pista sa Lungsod sa Oslob nahitabo ang nahisgutang insidente.

Niadtong Disyembre 12, 2024 ang biktima ug inahan niini nitaho sa Oslob Police Station sa nahitabo sa dalagita.  Apan niadtong Disyembre 13, 2024 napalgan nalang nga wala nay kinabuhi ang biktima.

Matud ni Police Captain Jan Ace Elcid Layug, tigpamaba sa Cebu Police Provincial Office (CPPO) nahibaw-an nga ang upat ka lalaki maoy suspek sa nahitabo sa dalagita pinaagi sa mga testimoniya sa mga saksi nga gisukit-sukit sa kapolisan ingon man pag-review nila sa mga footage sa  closed circuit television (CCTV) sa dapit.

Base sa taho sa kapolisan nga nagkaila ang mga suspetsado ug biktima atol sa  pista sa Lungsod sa Oslob niadtong Disyembre 9, 2024.

Niadto sila sa Lungsod sa Oslob aron mamista diin ang duha sa mga suspetsado adunay kabanay nga nagpuyo sa lungsod.

Giingong gidala sa mga suspetsado ang biktima sa usa ka balay sa Barangay Poblacion.

"We have yet to check kong naay criminal records (suspects) but we will work on that, checking kong naa sila'y involvement sa mga other criminal incidents or record", matud ni Layug .

Giandam na sa kapolisan ang pagpasaka og kasong statutory rape batok sa mga suspetsado. (BANAT NEWS)