Cordova gipasidunggan nunot sa kampanya batok drugas

CEBU, Philippines — Giila sa buhatan sa Department of Interior and Local Government (DILG) ang malampusong kampanya batok sa ilegal nga dugas sa Lungsod sa Cordova pinaagi sa paghatag og pasidungog. Si Cordova mayor Cesar "Didoy" Suan maoy midawat sa gihatag nga National Award sa DILG isip pag-ila sa malampuson niining kampanya pakigbatok sa illegal nga drugas pinaagi sa ilang pagkiglambigit sa komunidad.

Ilang nadawat ang award gumikan sa pag-angkon sa High Functionality sa 2024 Anti-Drug Abuse Council (ADAC) Performance Audit.

Ang maong prestihiyoso nga pasidungog gihatag atol usab sa 2024 Bansiwag Awards sa ADAC Functionality Category nga gipahiayon sa Marco Polo Plaza Hotel sa Siyudad sa Sugbo.

Ang Bansiwag Governance Awards alang sa mga LGUs, gipasiugdahan ni DILG-7 Regional Director Leonardo T. Trovela, nga usa ka programa nga naghatag og dakung importansya sa epektibong local governance.

Kauban ni Mayor Suan nga mitambong sa maong kalihokan ug misaksi sa pagdawat sa maong pasidungog si Bise Mayor Boyet Tago uban usab ni Police Major Joffre Grande nga maoy hepe sa kapolisan sa maong lungsod. — /MEL (BANAT NEWS)