Cortes gi-disqualify sa comelec

CEBU, Philippines — Ang Commission on Elections (Comelec) Second Division mi-grant o nipabor sa petisyon pagkanselar sa sertipiko de kandidatora sa na-dismiss nga mayor sa dakbayan sa Mandaue, Jonas Cortes alang sa umaabot nga eleksyon sa tuig 2205.

Sa dose (12) ka pahina nga desisyon sa Comelec penetsahan Disyembre 18, 2024, gisaysay nga ang pagkanselar sa certificate of candidacy (COC) ni Cortes tungod sa "material and false representation" sa COC sa nadismiss nga Mayor.

Ang maong desisyon gipirmahan ni Presiding Commissioner Marlon S. Casquejo ug Commissioners Rey E. Bulay ug Nelson J. Celis.

Ang maong petisyon giduso sa abogado nga si Ervin Estandarte niadtong Oktubre 25, kinsa mitumbok nga adunay "serious act of misrepresentation" sa COC ni Cortes sa dihang gi-tsek niini ang kahon sa COC kun diin adunay gilatid nga "I am eligible for the office I seek to be elected to.”

Dugang pa sa maong petisyon nga gisulatan ni Cortes nga " N/A" (not applicable) ang pangutana kun aduna bay siyay kaso ug kun aduna man, ibutang ang  case docket, case title, kanus-a gi-file ug status sa maong kaso.

Sa susamang petisyon gisaysay ni Estandarte nga si Cortes nasayod apan nadumili paglatid nga siya na-dismiss sa Ombudsman kun diin napahibalo siya niini niadtong Oktubre 3, o usa ka adlaw sa wala pa siya miduso sa iyang COC niadtong Oktubre 4.

Sumala ni Estandarte, ang kapakyas ni Cortes pagtug-an sa kamatuoran sa iyang COC, nahimong kwestyonable ang iyang panumpa sa iyang COC nga siya mosunod sa balaod.

Ang Comelec migrant sa maong petisyon ni Estandarte, pagtumbok sa Sections 74 and 78 sa Omnibus Election Code nga matod pa nalapas ni Cortes.

 “Respondent signed his COC and subscribed and sworn to the veracity of his declarations therein, indicating that his false representation is deliberate, and will effectively misled the electorate on his qualification as Mayor of Mandaue City, Cebu,” tipik sa desisyon.

Gimandoan usab sa Comelec Second Division ang City Election Officer sa Mandaue City nga personal nga itunol ang maong resolusyon ngadto sa petitioner ug sa regional director aron masiguro nga mapatuman ang maong kamandoan.

"Wherefore, considering the above premises, the petition is granted. The Certificate of Candidacy (COC) of respondent Jonas Cabungcal Cortes for Mayor of Mandaue City, Province of Cebu, for the 12 May 2025 National and Local Elections (2025 NLE) is hereby Denied due course to and/or cancelled," pagbasa sa desisyon sa Comelec 2nd division.

Sa pagsulat sa balita ,wala pa nadawat sa local Comelec ang maong kamandoan.

 “Ang ilang rason, kay dili na kuno ko kwalipikado mudagan tungod sa kaso nga dismissal ug disqualification. Usa kini ka dako nga SAYOP sa Comelec kay ang desisyon sa Ombudsman wala pa na final, ug anaa pa sa prosesso sa appeal,” matud ni Cortes kinsa nagkanayon nga ang iyang tubag sa petisyon mga giduso wala gikonsiderar sa Comelec.

Nagtoo si Cortes nga gituyo ang pagpatangtang sa iyang pangalan sa listahan sa mga kandidato aron nga walay kontra kadtong moatbang niya pagka mayor sa Mandaue sunod nga eleksyon.

“Apan, dili ko makatugot niini. Akong hutdon ang tanang paagi aron makuha nato ang hustisya,” matud ni Cortes kinsa misaad bisan moabot pa sa Korte Suprema.

Iya pud giawhag iyang kaatbang sa politika nga dili gamiton ang impluwensya niini aron may pressure ang Comelec. Sa habig ni Estandarte, nagkanayon kini nga dili na niya samotan ang sitwasyon, karon nga aduna nay desisyon ang Comelec.

Si Mandaue City Election Officer Anna Fleur Gujilde nagdumili usa paghatag og komento kabahin sa maong desisyon. (BANAT NEWS)