Kapitolyo maoy mopaayo sa simbahan sa Sibonga

CEBU, Philippines — Ang Probinsya sa Sugbo na lang ang mopaayo sa naguba nga Nuestra Señora del Pilar de Zaragoza Church sa lungsod sa Sibonga, nga unang gisaaran sa Tourism Infrastracture and Enterprise Zone Authority (TIEZA) nga ayuhon human kini naguba sa bagyong Odette.

Atol sa tigom ni Gobernador Gwendolyn Garcia uban ang pipila ka mga opisyal sa TIEZA, mipadangat ang gobernador sa “frustration” niini sa aksyon sa TIEZA nga naabtan na lang og tuig wala pa gihapon kini mahimo.

Kini ang hinongdan nga midesisyon si Garcia nga ang Kapitolyo na lang ang mopondo alang sa pagpaayo sa interior artworks ilabina sa kisame sa simbahan sa Sibonga nga giila nga Level III historical site sa National Historical Commission of the Philippines (NHCP).

“You tell Mark Lapid, thanks but no thanks” matod ni Garcia sa mga opisyal sa TIEZA atol sa ilang tigom.

Ang gobernador misandig sa seksyon 16 sa Akta Republika 7610 o ang Local Government Code of the Philippines, nga naghatag og otoridad sa local government unit sa pagpromote sa kaluwasan ug “well-being” sa mga konsituwente niini.

Ang maong balaud nagtugot sa mga LGU nga mohimo og aksyon o programa sama sa cultural heritage ug preservation isip independente nga pangagamhanan kon ugaling pakyas paghimo sa obligasyon niini.

Kini maoy gibasehan ni Garcia aron ang Kapitolyo na lang ang mopaayo sa maong simbahan alang sa “general welfare” sa mga taga Sibonga.

Ang TIEZA nga usa ka infrastructure arm sa Department of Tourism (DOT) misaad nga mag gahin og P110 million alang sa pagpaayo sa pipila ka bahin sa simbahan nga naguba sa bagyong Odette niadtong tuig 2021.

Ang general manager ug COO niini nga si Mark Lapid, gikuyogan pa ni Garcia aron pagbisita sa maong simbahan niadtong 2022. Gisaway ni Garcia ang TIEZA sa gihimong rehabilitation study niini diin migasto ang gobyerno og P5 million apan gamay ra kaayo ang progress alang na unta sa aktwal nga restoration o pagpaayo sa maong simbahan.

Si Garcia nagkanayon nga makig-alayon ang Kapitolyo sa National Commission for Culture and the Arts (NCCA) aron masiguro nga ang pagpaayo sa maong simbahan masubay sa guidelines sa cultural heritage structures. (BANAT NEWS)