Mga magtutuo nihugop sa ikatulong adlaw sa Misa de Gallo

CEBU, Philippines — Gihugpaan sa bagang duot sa mga magtutuo ang ikatulong adlaw sa Misa de Gallo ni Archbishop Jose Palma uban sa mga kaparian sa Archdiocese of Cebu ug sa kura paruko sa San Isidro Labrado Parish Padre Villy Jean Cortes nga nahimutang sa Barangay Nug-as, bukirang bahin sa Lungsod sa Alcoy adlaw nga miyerkules.

Ang mga magtutuo nilakaw pa og lagyo ug nisayo sa simbahan aron makatambong sa Santos nga Misa subay sa ikatulo ka adlaw sa Misa de Gallo.

Atol sa iyang homiliya, si Palma nipaambit kalabot ni St. Joseph diin gitumbok niini ang papel sa usa ka amahan diha sa pamilya.

Gilakbit ni Palma nga hangpon ang panultihon sa mga Benedictine nga “Ora et Labora” kon pag-ampo ug pagtrabaho isip ilang giya sa pagbuhi sa ilang pamilya.

Giawhag usab ni Palma ang mga amahan sa ilang kaakuhan sa pagtudlo sa ilang anak ilabi na diha sa pag-ampo tungod kay dili lang kini responsibilidad usab sa inahan nga ilang gisapupo.

Si Palma nagkanayon nga angay usab ang tawo nga motrabaho aron aduna sila’y mahimong magamit ilabi na sa ilang panginahanglanon ug pagbuhi sa ilang pamilya.

Atol sa wali ni Palma gipahibalo niini nga ang archdiocese mohatag ug P200 mil sa parokya sa nug-as alang sa nagpadayon nga pagtrabaho sa pagpabarog sa ilang parokya ug giawhag ang mga magtutuo nga padayon gihapon sa pagtabang tungod kay iyaha man kini sa komunidad ug ang mga pari nga moabot sa maong dapit lumalabay lang.

Human sa Santos nga Misa adunay special blessings nga gihimo alang sa tanan mga kabataan nga nitambong sa maong Misa de Gallo.

Adunay upat ka dagkong kaldero sa lugaw nga giapod-apod sa tanang mga parokyano nga nitambong sa Santos nga Misa. (BANAT NEWS)