Lote nga bawion sa siyudad tukoran og housing projects

CEBU, Philippines — Di mominos 30,000 ka mga housing backlogs ang gibana-banang natala sa dakbayan sa Sugbo diin nagpakita sa dinalian nga pagbawi sa mga lote nga gipanag-iya sa dakbayan.

Kini human nga nagtuki sa gisugyot nga pagbakwi sa Evangelical Christian Coalition of Cebu (ECCC) nga lote sa Barangay Kalunasan.

Atol sa executive session kagahapon, ang konseho nagtuki sa rekomendasyon sa Office of the Cebu City Legal nga i-revoke ang deed of donation nga gipatuman sa Cebu City Government ngadto sa ECCC human masayri nga wala kini gigamit nga sementeryo sa Barangay Kalunasan sumala sa gikasabotan.

Ang proponent nga si Konsehal Jerry Guardo, Chairman sa Committee on Infrastructure nagkanayon nga angayan lang nga bawion sa kagamhanan sa dakbayan ang upat ka ektarya nga luna nga gitumbok nga prime slot nga adunay panoramic view.

Si Architect Yumi Espina sa Cebu City Planning and Development Office (CPDO) nipresentar sa konsepto sa gisugyot nga Kalunasan Housing ngadto sa konseho.

Atol sa iyang presentasyon, gipasabot ni Espina nga ang siyudad nanginahanglan og mga housing projects busa adunay nagkalain-laing lote sa siyudad nga mahimong magamit lakip na niini ang dapit sa Kalunasan.

Matod niya, sa pagkakaron ang maong lugar ang gi-zone isip Parks and Recreation. Sumala sa gi presenter ni Espina, kini nga lugar gilangkuban sa tulo ka mga lote.

Sa datus nga iyang gipresentar, si Espina niingon nga niadtong 2014 nga gikutlo sa report sa Division of Welfare and Urban Poor, ang housing backlogs anaa na sa 26,632 nga naglangkob sa 12,043 sa Cebu City North ug 14,589 sa South District.

Sa higayon nga mabawi na ang luna sa Kalunasan, si Espina niingon nga makatukod sila og socialize housing sa ubos nga bahin sa yuta samtang ang ibabaw nga bahin maoy mobarog isip economic housing.

Gawas niini, nagplano usab sila nga magtukod og high-rise structure ug low-rise building sa samang lugar. (BANAT NEWS)