Mga kawani sa dakbayan dili na makadawat og SRI
CEBU, Philippines — Human nga nakadawat sa P25,000 nga Christmas bonus, giklaro ni Cebu City Mayor Raymond Alvin Garcia nga dili na makadawat og dugang P20,000 nga Service Recognition Incentive ang mga kawani sa kagamhanan.
Dili pa lang dugay, miluwat og memorandum si Presidente Ferdinand R. Marcos Jr. sa paghatag og one-time Service Recognition Incentive (SRI) nga P20,000 para sa mga kawani sa gobyerno sa executive branch.
Ang mga kwalipikado alang sa P20,000 nga SRI mao ang mga sibilyan nga kawani sa mga ahensya sa nasudnong kagamhanan lakip na ang anaa sa state universities and colleges (SUCs) ug government-owned or controlled corporations (GOCCs), nga nag-okupar sa regular, contractual o casual nga posisyon.
“Although naay memorandum pero nakahatag na ta og P25,000. I think ang gibuhat sa presidente is only if the local government don’t have a basis to give bonuses on December”, suma pa ni Mayor Garcia.
Apan ang budget ordinance sa dakbayan mohatag gyud og bonus sa matag empleyado sa buwan sa Disyembre mao nga dili na kinahanglan nga modugang pa og laing kantidad.
“Pero og naa mohatag gikan national, nganong dili dawaton, ay lang (gikan sa pundo) sa Cebu City”, suma pa ni Garcia.
Nasayran niadtong miaging semana lang sab gipanghatag sa Cebu City Treasurer’s Office ang Christmas bonus alang sa mga kawani sa kagamhanan sa dakbayan sa Sugbo. (BANAT NEWS)
- Latest
