Topnotchers sa bar exam ug let pasidunggan

CEBU, Philippines — Gikatakdang hatagan og pasidungog sa Probinsya sa Sugbo ang mga Sugboanon nga maoy nag-una sa mga passers sa Bar Exam ug sa licensure Examination for Professional Teachers (LET).

Ang talagsaon nga kalampusan sa maong mga graduates, gidayeg ni gobernador Gwendolyn Garcia kinsa nagkanayon nga dako kini nga garbo sa mga Sugboanon.

“Cebu and the Cebuanos continue to lead the way. We set the standard of excellence that is always raised with every achievement,” matod ni Garcia sa taho sa Sugbo News, ang news portal sa Probinsya sa Sugbo.

Sa bar exam, o ang eksaminasyon alang sa mga buot mag abogado, ang lumad nga taga dakbayan sa Lapu-Lapu nga si Kyle Christian Tutor kinsa usa ka law graduate sa UP Diliman College of Law maoy top 1 pinaagi sa score nga 85.77%.

Si Johndaniel D. Hamoy, gikan sa University of San Carlos Law School, naa pud sa top 14 sa maong examination.

Pag-abot sa LET, o ang eksaminasyon alang sa mga buot magmaestra, ang mga graduates gikan sa Cebu Normal University (CNU) ang nanguna.

Sila si Nomel Alyssa Andan ug Mary Eloisa Fullo parehong nag top sa Elementary category, samtang si Lara Montebon Tero mao usab ang top sa Secondary level.

Samtang, ang upat ka mga Sugboanong opisyal sa police nga nakapasar sa 2024 Bar Examination, nag-courtesy call usab ngadto sa gobernadora kagahapong adlawa sa Kapitolyo.

Sila si PLtCol Jomar Medil gikan sa Alcoy; PLtCol Verniño Noserale sa Lapu-Lapu City; ug PSMS Rex Sugarol gikan sa Carmen ug PLtCol Maila Maramag gikan sa lungsod sa Barili ang mibisita sa buhatan sa gobernador, diin sila personal nga gidayeg ni Garcia sa ilang kalampusan.

Ang maong mga police personnel, dungan og hatagan og pasidungog sa usa ka pormal nga seremonya sa Kapitolyo uban sa 40 ka Outsanding Cebuano graduates nga mi-top sa BAR Exam ug sa LET.  (BANAT NEWS)