Mga konsumidor sa VECO makasinati og kunhod sa kuryente

CEBU, Philippines — Ang residential nga mga konsumidor sa Visayan Electric Company (VECO) makasinati og P0.68/kWh nga pagkunhod sa ilangf konsumo sa kuryente alang sa ilang Disyembre karong tuiga hangtud Enero nga billing sa sunod tuig.

Kini niubos sa kinatibuk-ang residential rate ngadto sa P11.51/kWh gikan sa niaging buwan nga P12.19/kWh, nga nagpasabot nga makadaginot og labing menos P136 ang usa ka panimalay nga mokonsumo og 200 kilowatt-hours.

Matud sa VECO ngA ang pagkunhod sa rate tungod sa pag-ubos sa presyo sa elektrisidad sa Wholesale Electricity Spot Market (WESM), usa ka avenue diin gipamaligya ang kuryente.

Apan bisan niini, gipahinumdoman sa VECO ang mga konsumidor nga magmatngon sa paggamit sa kuryente karong holiday season.

“Let us not be too complacent with the recent reduction in the electricity rate, as our usage during the holiday season may be unusually high, resulting in a higher bill despite the decrease in the rate”, matud ni Visayan Electric President ug COO Raul Lucero.

Pipila sa mga hinungdan sa taas nga konsumo sa elekrisidad sa panahon sa holiday naglakip sa electronic nga mga dekorasyon sa pasko, mga refrigerator nga puno sa stock, ug ang mas dugay o mas kanunay nga paggamit sa appliances sama sa electric fan, air conditioner ug telebisyon.

Ang distribution utility nipahimangno sa mga konsumidor nga magkat-on og mga lakang sa pagdaginot sa enerhiya sama sa paggamit sa mga suga nga LED alang sa mga dekorasyon, pagpalong sa wala kinahanglana nga mga appliances ug pagpahimutang sa mga air conditioner sa husto nga temperatura. (BANAT NEWS)